WILLEMSTAD.- ‘Kuerpo Polisial ta sinti su mes hopi komprometé pa sigur nos forma parti di Aliansa. Pasobra praktikamente diariamente nos ta haña nos ku víktimanan di violensia relashonal i tambe muchanan ku ta bira víktima di un òf otro forma di maltrato. E kasonan aki sigur ta oumentando tiki tiki. I esaki ta un preokupashon pa nos komo kuerpo polisial.’ Asina bosero di Kuerpo di Polis di Kòrsou, Imro Zwerwer a bisa djaluna último. Zwerwer a papia durante konferensia di prensa di organisashon Aliansa. Durante e konferensia di prensa Aliansa a presentá dos spòt nobo ku tin komo meta pa baha e drèmpel pa hende bai hasi denunsia ora nan bira víktima di violensia òf abusu.
Zwerwer: ‘No opstante e esfuersonan ku nos ta hasi ainda nos ta sinti ku bèrdat e barera pa por yega na Kuerpo polisial ta un poko haltu.’
Segun Zwerwer esaki tin diferente motibu. ‘Kisas hende tin bèrgwensa. Otronan ta pensa ku kisas nan no tin e konfiansa kompletamente den Kuerpo Polisial. I otronan simplemente no sa unda nan tin ku bai na momentu ku nan a haña nan mes den un situashon asin’aki.’
Segun Zwerwer pa e motibu ei ta sumamente importante ku un organisashon manera Aliansa ta informá pueblo. Segun Zwerwer Aliansa ta fungi komo portal pa hende por aserká i den e forma ei nan por wòrdu referí na Kuerpo Polisial.
E bosero di polis ta bisa ku ta sumamente importante ku polis ta traha konhuntamente ku komunidat i ku organisashon manera Aliansa. ‘No solamente pa nos tendé e kasonan di violensia relashonal, maltrato di mucha ets. pero mas aun pa nos yuda konsientisá komunidat traha den un forma preventivo. Pa hustamente nos baha e kantidat di kasonan aki.’