WILLEMSTAD.- Kuerpo polisial ta rekordá tur siudadano riba kontròl di plachi di dia ta kontinuá, ounke ku gobièrnu a suavisá algun medida.
Ayera dia 4 di mei, ta hasi un luna ku dos siman ku negoshinan a bolbe habri nan porta. Sinembargo plachi di dia ta keda vigente pa por bishitá e establesimentunan habrí.
Di akuerdo ku Kuerpo Polisial, no opstante ku a de-eskalá medidanan den kuadro di COVID-19, Kuerpo Polisial lo sigui ku kontròlnan, pa asina ei por garantisá ku no ta bai tin aglomerashon ni
tampoko demasiado persona innesesariamente riba kaya.
Polis ta hopi satisfecho ku e komportashon general di públiko te na e momentunan aki, i ta gradisí komunidat pa e komprenshon pa e situashon i e koperashon ku e ta duna dor di sigui reglanan i òrdu di outoridat.
Sinembargo nos no a yega ainda i e loke ku falta, ta huntu nos mester sigui kana pa logr’é.
Ta e intenshon ku gradualmente mester yega na normalidat i maneho di òrdu
públiko ta un instrumental den esaki.
P’esei polis lo sigui ehersé kontròl, kaminda lo sigui pone hopi atenshon riba ‘plachi di dia’, aglomerashon, distansia físiko i Toke de Keda.
Un apelashon ta bai na tur siudadano ku obligatoriamente mester ta riba kaya, pa trata na proba esaki durante di kontròl, mas tantu posibel di un manera òf otro.
Finalmente kuerpo polisial ke keda hasi un yamada na tur kompatriota, pa laga nos ban sigui kuida nos mes i otro dor di evitá na sali kas, si no tin un motibu di urgensia òf di importansia pa esaki.