WILLEMSTAD. - Asesinonan di Giba i Kleine na Rotterdam a laga vários evidensia atras i polis ta trahando riba nan. Entre otro polis tin video di e momentu ku e dòbel asesinato a tuma lugá i tambe video di un di e posibel matonnan.

Manera ta konosí dia 20 di desèmber tras di lomba a tuma lugá likidashon di dos persona kurasoleño, den e kaso aki Gilbert Henrietta (26) ku ta keda yamá Giljomar òf Giba i Lindomar Elisabeth ku nan ta yama Kleine. E tabatin 25 aña di edat.

Polis tin video di e krímen kometé di kámaranan di seguridat ku tabatin den e kaya en kuestion.

Tabata kuartu pa shete di anochi ora ku un outo Audi stationwagon a stashoná den e kaya Rhijnauwensingel.  Mas o ménos 10 minüt despues por mira Kleine i Giba ta kana pasa banda di e outo Audi sin sa ku nan asesinonan tabata sintá den e outo.

Manera Giba i Kleine a drenta den nan outo ku ta dos outo dilanti di e Audi, e Audi a sali for di kaminda ku e ta stashoná kant’i kaminda i bai para pegá ku e Seat Leon ku Kleine i Giba tabata den.

Aki nan a yena e outo ku bala i konsekuentemente tur e dos víktimanan a fayesé. Un di nan a muri mes momentu i e otro a muri algun ratu despues.

Su dia siguiente polis ta haña e Audi ku a keda hòrtá algun dia promé, kimá na Kruisweg na Ridderkerk.

Polis ulandes a indiká ku ounke ku e outo a kima kompleto, tòg tin evidensianan ku e asesinatonan a laga atras ku polis ta trahando ariba.

Banda di esei polis ta hañando hopi informashon i p’esei nan ta pasa algun video ku nan tin na televishon pa wak si tin hende ta rekonosé un di e posibel matonnan.

Tin video di e Audi stashoná algun ora promé ku e asesinato a tuma lugá den e kaya kaba, klaramente pa opservá e área. Por mira tambe un persona ta baha for di e outo i e video ei polis ke pa komunidat ulandes wak si nan por rekonosé sikiera e forma di kana di e persona aki. E persona aki tin un forma di kana un poko remarkabel.

Polis ta pidi esnan ku lo por sa ta ken a kometé e asesinato i dikon a likidá e dos personanan aki. Ken por a ripará algu di e sendementu di outo na kandela na Kruisweg i ken por tin posibel kámara den e áreanan menshoná ku nan por tin video di e hendenan ku a kometé e krímen.