WILLEMSTAD.- Polis di Kòrsou awe a duna di konosé ku e víktima den e kaso di tiramentu ku morto riba Kaya Charles Maduro a keda identifiká komo Gedion Shurlendy Manuel, nasé na Kòrsou dia 1 di febrüari 1982.
Djaluna 15 di sèptèmber 2025 alrededor di 00.23’or, Sentral di polis a dirigí unidatnan na altura di pòmp di gasolin na Brievengat, pa un kaso di tiramentu. Segun polis ora Manuel a yega na altura di un café riba Kaya Charles Maduro un otro vehíkulo tambe a kore yega. Un hòmber a baha for di e último vehíkulo aki i kuminsá tira dirigí riba e otro outo.
Mesora e outo den kua e víktima tabata a kore bai for di e sitio, pero no muchu leu for di e sitio, el a dal violentamente kontra muraya di e pòmp di gasolin. E hòmber víktima tabatin diferente herida na e parti ariba di su kurpa i a fayesé na e sitio mes.