WILLEMSTAD.- Djárason 19 di yüli 2017, alrededor di 14.05’or un patruya di e tim general di mantenshon di órden públiko a kuminsá un investigashon riba posishon di droga i arma ku a kulminá na un kas den e bario di Krakeel. Na e kas en kuestion polis a hasi un entrada Hudisial.  Durante di e kòntròl aki polis a haña i konfiská: Un(1) arma di kandela outomátiko

Un(1) pistol marka Glock  Kantidat di munishon ( bala skèrpi). Kantidat di saku grandi ku Mariwana. Atributonan pa planta, prosesá i kultivá Mariwana Un bròmer probablemente prosedente di ladronisia. Kontinuando ku e investigashon polis a haña un KIA Rio di dal riba e tereno. Ora ku e agentenan tabata hasi investigashon na e outo aki nan ta sinti un holó fuerte di Mariwana den e besindario aki tambe.

E momento ei nan a bai na un kas ku ta den konstrukshon i ku no ta habitá. E kas aki ta konsistí di kuater(4) kamber di kua tres(3) di e kambernan ta fungi komo lugá di kultivá mariwana.

Polis a konstatá ku tabatin hòrtamentu di koriente. Mas aleu polis a haña un kònteiner riba e tereno ku den dje un outo Ford Edge i un kantidat di piesa di motor i bòdi  ku probablemente ta prosedente di ladronisia.  A konfiská tur e artíkulonan aki pa mas investigashon. E investigashon den e kaso aki ta kontinuá.