WILLEMSTAD.- Maske por tin un lider spiritual ku por a hasi su mes kulpabel di aktonan kriminal, no por kulpa ni tilda ningun polis di nada djis pasobra nan ta miembro dje iglesia ei. Esei ta un derecho sagrado ku tur hende tin i ku difísilmente por mishi kuné. Asina Minister di Hustisia. mr. Quincy Girigorie, a duna di konosé na EXTRA ayera relashoná ku henter e situashon di Pastor Lando B. kende e siman aki a keda sentensia na 9 aña di prizòn pa aktonan inmoral i abusu seksual. Ta konosí tambe ku tin diferente miembro di kuerpo polisial ku alabes ta miembro di e iglesia aki i ku no opstante e fechorianan ku a ser deskubrí, ketu bai ta afiliá na e iglesia.

Segun e minister, ta eksistí un kódigo di integridat den e kadena hudisial i e ta algu ku ta konta pa polisnan tambe. Loke por bisa ta ku, na momentu ku un polis falta ku e kódigo ei bo por hala su atenshon òf tuma medida. Pero si un polis a disidí ku e ke bira miembro di un kongregashon kristian, e ta kompletamente liber pa hasi esei. E ta hasiendo uso di un derecho fundamental ku no fásilmente bo por mishi kuné. E derecho di afiliá di forma liber na kualke organisashon ta algu sagrado.

Awor si e mesun polis ku ta miembro di un asosiashon asina ta parti tambe di aktividatnan kontra lei, anto kosnan ta kambia.

Klaramente den kaso di Pastor Lando esaki a hasi su mes kulpabel di sierto kosnan, pero no por kulpa miembronan di e iglesia di ta kómplise. Ta e hende ei tabata robes, el a aktua su so i el a haña kastigu. I den un kaso asina no tin nada ku por hasi.