WILLEMSTAD.- Siman pasá a kumpli un luna ku un dama a keda kruelmente asesiná den su apartamentu pa su propio pareha.

Su siguiente dia outoridatnan a saka foto di e sospechoso pidiendo yudansa na komunidat.

Pero te awe ainda niun paradero di e sospechoso ni tampoko no a risibí informashon pa ku paradero di e hòmber ku hustisia ta buskando.

Tabata dia 7 di òktober último alrededor di sinku pasá di kuater di mardugá, Sentral di Polis a risibí notifikashon di un kaso di hinkamentu ku a tuma lugá na un kas den Wishi.

Tambe Sentral a keda informá ku un konosí a bai ku e víktima den su outo personal pa poliklínika di SEHOS pa tratamentu médiko.

For di un investigashon ku polis a hasi na SEHOS a resultá ku e dama víktima di 39 aña di edat, a yega poliklínika ku vários hinká na vários parti di su kurpa i a fayesé.

Siguiendo ku e investigashon ku polis a hasi, probablemente ta trata aki di un krímen pashonal.

Alrededor di mitar di seis di mainta dòkter a konstatá morto di e víktima ku a keda identifiká komo: Lisbeht Karina Contreras Guerrero, nasé na Venezuela 1e di òktober 1980.

Riba òrdu di Fiskal di Ministerio Públiko a konfiská e kurpa sin bida pa mas investigashon.

Un biaha mas polis ta pidi komunidat koperashon, pa kualke persona ku por rekonosé e hòmber riba e potrèt aki bou òf ku tin mas informashon tokante di e kaso, pa mèldu esaki na polis via di e numbernan 917 òf e liña anónimo 108.