WILLEMSTAD.- Polítika tradishonal no ta duna masha espasio pa ideanan nobo aki na Kòrsou. Su afinidat pa polítika a resultá un opstákulo pa e por a lanta un kompania di seguro. I asina por bisa ku esakinan tabata e motibunan prinsipal dikon Danny Ruiter a disidí ku e ta retirá for di polítika riba nos isla i sigui dediká su mes na su karera komo un profeshonal riba tereno di seguro na Hulanda. Asina e hóben di 21 aña Ruiter a duna di konosé den un konferensia di prensa ayera tardi.

Manera ta konosí, e aña aki e hóben a bini Kòrsou for di Hulanda ku hopi entusiasmo pa duna un kontribushon na su pais natal. Primeramente el a afiliá su mes na Partido Demokrat, pero e matrimonio aki no a dura muchu largu (aprel-yüli). Segun Ruiter, el a sinti ku e polítika tradishonal den e partido no a duna muchu espasio pa su ideanan. Ademas kosnan no ta kana ku muchu konkordansia, miéntras ku dirigentenan ta papia riba otronan i no ta tuma tempu pa papia ku otro pa hasi palabrashonnan na drechi.

Den luna di ougùstùs Ruiter a djòin Partido Kumun unda el a keda te ku awor ku el a retirá. El a splika ku aki e no tabatin ningun problema, el a keda ku un bon relashon ku liderazgo di partido. Por sierto, asta el a yuda traha riba e programa di akshon dje partido. El a tuma su retiro awor pa e motibunan ariba menshoná i riba kual el a amplia den e enkuentro ku prensa. Polítika ta manera palabra malu aki na Kòrsou!

Kompania di Seguro:

Segun e hóben, durante su estadia aki na Kòrsou el a disidí ku e lo lanta un kompania di seguro. El a kana e trayekto legal kual ta enserá un petishon na Banko Sentral pa e por haña e pèrmitnan nesesario. E tin di rekonosé ku Banko Sentral a krea sierto speransanan serka dje, pero finalmente a rechasá su petishon.

Segun Ruiter, el a konkluí ku den e kaso aki su afinidat pa polítika a hunga un ròl, miéntras ku e institushon aki ketu bai ta hasiendo uso di leinan antikuá den su maneho.

El a splika ku e lo por a opta pa bai korte pa buska su derecho, pero el a disidí di kontinuá ku desaroyo di su karera komo un profeshonal den seguro.

Opviamente Danny Ruiter a keda hopi desepshoná den su regreso na Kòrsou, aunke el a laga porta habrí pa si un dia hasi apelashon riba su persona pa yuda den kualke funshon. E tin vasto konosementu riba hopi tereno, sigur si tene kuenta ku el a asumí funshonnan den diferente konseho munisipal na Hulanda.