Philipsburg,- Den un desishon di korte komun di hustisia a pronunsiá ku Theodore “Theo” Heyliger, eks lider di partido United Peoples Party (UPP), a keda apsolv’é di tur akusashon den su kontra den e kaso ku a haña e nòmber Catfish. E veredikto a keda pronunsiá den korte na Korsou i via video conference a transmití esei pa St.Maarten.

Den e veredikto korte ta dikta ku no por a haña prueba ku di bèrdat e lider di UPP a ofresé e eks miembro di Parlamento di St.Maarten, sr. Romaine Laville soborno i di otro banda tambe a bisa ku e deklarashonnan di Jaap van den Heuvel, propietario di e klup nokturno Bada Bing tambe no ta atmisibel.

Otro viktoria pa Heyliger tabata na momento ku korte a dikta ku e testigu prinsipal den e kaso Larimar, Ronald Masdaam mester presentá den korte na St.Maarten di manera ku e tim di defensa tambe por kuestion’e. Korte mester determiná ki fecha i na unda ta bai interogá Masdaam, banda di e echo ku mester perkurá pa su seguridat miéntras e ta den man di hustisia.