WILLEMSTAD.-Awe mainta a drenta informashon ku ir. Don Martina, polítiko legendario a fayesé. Don Martina pa algun aña a hala tras for di polítika aktivo, pero ta hopi ta esnan ku ta sigui ‘kans’é’ pa su vishon riba desaroyonan tantu den e pais aki komo na nivel internashonal.

Don Martina (1935) a surgi den polítika na Kòrsou den añanan 70. Despues a bini lantamentu di partido MAN ku for di e tempu ei a para pa hustisia sosial i integridat. Ta bou di Don Martina a lansa e lema ‘Man limpi den gobièrnu’, hustamentu den e lucha kontra korupshon i faltamentu ku integridat. Na 1979 Don Martina a kibra record logrando gran kantidat di voto personal. El a sirbi na dos okashon komo promé minister di Antia, e promé periodo di 1979 pa 1984 i e di dos periodo di 1986 pa 1988.

Demostrando su karakter fuerte, a surgi momentu kaminda Don Martina i su yunan a bandoná e filanan di partido MAN, e partido ku e tambe a funda. E no por a biba ku e direkshon ku partido MAN a tuma. Despues di hopi aña Don Martina i sigur su yu Steve a uni bèk na partido MAN.

Ultimo añanan EXTRA a entrevista Don Martina na algun okashon relashoná ku proyektonan di produkshon di ‘nos propio kuminda’, esta plantamentu i krio di bestia huntu ku su yunan Robin, Steven i kasa sra. Suze.

Forsa na famianan i ku Don Martina sosegá na pas.