Bianca Rafaela

Advocatenkantoor Rafaela

www.advocatenkantoorrafaela.nl

Rotterdam

 

Konsulta grátis di abogado pa antianonan na Ulanda

…..Mr. Bianca Rafaela, abogado na Rotterdam ta enfatisá ku hopi antiano/yu di Kòrsou ta Ulanda ta hasiendo bon trabou. E grupo ku mester di yudansa, e grupo ku mas ta hañando atenshon tòg ta basta chikí. Pero tin e situashon di e grupo ku ta bai establesé nan mes na Ulanda ku no ta prepará nan mes bon. Nan ta bai un pais, sin e preparashonnan nesesario i topa ku problema einan.

 

11 aña abogado…

 

Bianca tin e afinishon pa abogasia for di tempu e tabata chikí. I el a hasi loke e tabata ke i hasi su soño realidat. E tin 11 aña komo abogado i ku su propio ofisina 6 aña. Bianca ta konta ku su eksperensia ku antianonan ta bon. E ta yuda hopi antiano komo e ta papia papiamentu i ta mas fásil pa nan. Ora el a kuminsá su ofisina el a traha su logo ku e brùg Emma di Kòrsou pero no ku den su kabes pa su konsentrashon ta mas pa antianonan, pero e kos a bira ku e ta atendé mas tantu kaso di antianonan na Ulanda. Bianca mes tin 26 aña biba na Ulanda i su kurason semper ta keda bati na Kòrsou.

 

Ki tipo di kaso…

Segun Bianca e kasonan ku mas e ta topa kuné na Ulanda di antianonan ta esnan penal. Ora detené un persona, e ta keda yama pa polis pero tambe e ta atendé hopi trabou di hóbennan. Tambe e ta hasi e parti sivil di hóbennan por ehèmpel ora saka mucha for di kas òf yuda e mayornan, tutela, alimentashon, kasonan di kobransa, bestuursrecht por ehèmpel si un hende pidi un uitkering i e keda nengá pa esaki, e ta bai den apelashon.

 

Kaso di hóbennan….

E kasonan segun Bianca ku mas ta resaltá serka dje ta kasonan penal i e kasonan ku ta saka mucha for di kaso i ku mester pone nan bou di supervishon. Tin un diferensia entre Kòrsou i Ulanda pa loke ta kultura i banda di esei hopi hende ta bai establesé nan mes na Ulanda pa loko. E ta un problema grandi vooral pa hende ku hopi yu òf keda den kaso di hende ku tin hopi hende. Ora un mucha chikí kai será, ta envolví e Raad voor Kinderbescherming mesora i e raad aki ta bai wak e mucha su biba, hasi investigashon pa buska un solushon.

Buska informashon promé….

Tin hende ta bai Ulanda pa loko segun Bianca. Mester buska informashon kon ta haña kas, e kondishonnan, kon ta haña trabou, skol pa e muchanan, e nivel di e muchanan pa sa kiko traha na dje i mester konosé bo mes bon i pone meta bo dilanti. Tin hende ta bai Ulanda sin meta pero ku desesperashon. Tin hende ta bai Ulanda ku den mente nan ta bai kobra e uitkering, pero esaki awendia ta dura sigur 8 siman i banda di dje e gemeentenan ta hasi hopi difísil i ta pidi mas i mas informashon ku ta pone dura hopi largu. Bianca ta sinti tin ora ku esei ta wòrdu hasí pa malu, esta rèk e tumamentu di desishon pa un hende por haña uitkering.

 

Den e tipo di kasonan ei ta haña hende ku ta keda pone riba kaya, Hopi biaha segun Bianca nan ta yama su ofisina, pero si e no tin bezwaar e no por hasi nada. El a ripará ku tin hopi fundashonnan na Ulanda ku ta yuda antianonan. I su rekomendashon ta pa esun ku ke bai Ulanda tuma kontakto ku un di e fundashonnan ei pa haña e yudansa nesesario.

 

Prepará….

Ounke Bianca ta haña ku un hende tin di prepará su mes bon promé ku e bai Ulanda. I no laga ora yega Ulanda ta bai prepará. Famia i amigunan ta invita otro pa bin Ulanda, pero e sistema na ulanda ta otro for di Kòrsou. Tur kos ta karu i tin hopi kondishonnan. Un famia òf amigu por invitá otro bin Ulanda, pero si e kas tin muchu hende den dje, e persona di ekas ei tin chèns di pèrdè su uitkering òf ta pèrdè but òf ta baha e uitkering.

 

E problema di mas grandi serka antianonan ta ku nan ta keda hopi biaha den nan mes hendenan i esei ta pone ku nan no ta integrá fásilmente na Ulanda. Bianca ta haña ku esun ku bai Ulanda, e mester sòru di drenta otro kultura, sòru traha i envolví ku otronan.

 

Ora nos hasi algu nos ta hasié bon…

Por bisa ku antianonan tin mal nòmber na Ulanda, pero pa Bianca e ta “val mee”. El a bisa Djasabra ku no ta tur ora ku e antiano aserka tin di aber ku kasonan penal. Tin biaha tin otro problema ku no tin di aber ku algu kriminal. Tin parti di antianonan ku ta den bon kaminda. “Ora nos hasi algu nos ta ekselá. Nos ta hasié mihó ku otro hende”, asina Bianca a opservá. El a bisa ku resientemente Ocan tabatin un seri di entrevista ku antianonan ku ta hasiendo tremendo trabou na Ulanda. I ta kosnan ku ta sorprendé. Hopi bia ta kosnan negativo ta bin dilanti miéntras e gran mayoria ta hasiendo tremendo trabou na Ulanda.

 

Duna bèk na komunidat…

Bianca su lema den bida ta ku ora e tin éksito, e ta duna algu bèk na e komunidat. I p’esei e tin oranan di konsulta den bario na Capella i Doordrecht. Ta trata di konsultanan grandi ku e ta duna konsehonan. Esaki Bianca ta hasi un bia pa luna. E ta bai hasié den mas gemeente próksimamente. Bianca ke pa mas i mas hende sa di e konsultanan ku e ta duna grátis pa antianonan. E ta atendé ku klientenan rònt Ulanda.

 

Bianca lo tabatin gana di traha na Kòrsou tambe. El a purba bin Kòrsou, tabatin momentu e mester a tuma e desishon pa keda Ulanda òf bin Kòrsou, el a solisitá na Kòrsou pero no a logra, i p’esei el a disidí di habri su mes ofisina di abogasia na Ulanda.


No laga te ora ta lat…..

 

Bianca a terminá bisando pa no sinta warda te ora kos bai fout. No tene bèrgwensa pero tuma kontakto ku e ofisina aki i no warda te ora ta lat.

 

E ofisina di Bianca ta na Westblaak 32 Rotterdam

LAGA UN KOMENTARIO

Please enter your comment!
Please enter your name here