WILLEMSTAD.- Sra. Kenis Yolbana-Rodriquez djárason último durante konferensia di prensa di organisashon Aliansa a hasi un yamada emoshonal i dramátiko pa e por haña su yu di 9 aña bèk. Ta trata di un mucha muhé ku yama Cora. E yu a bin tres aña pasá ku su tata hurídiko, ku tin nashonalidat hulandes, for di Colombia na Kòrsou pa siña hulandes pa un aña, pa despues henter e famia lo bai biba Hulanda. E mama, ku ta kolombiana, a keda na su pais.
Pero e tata, ku ta kasá di sra. Yolbana-Rodriquez, a bira malu i mester a bai bèk Colombia pa tratamentu médiko. El a laga su yu den kustodia di un subrina na Kòrsou, i pa esei a firma un dokumento di Voogdijraad tambe. E hòmber a fayesé 21 yanüari 2021. Despues Kenis Yolbana-Rodriquez a bin Kòrsou pa buska su yu, pero te ainda segun hues e yu tin ku keda ku e tutor. E dama kolombiana a bisa ku te ainda e ta keda na Kòrsou wardando riba momento ku e por brasa su yu muhé atrobe. Pero te ainda segun hues e mag di papia solamente tres bia pa siman mei ora via video-call ku e yu. E kombersashon ta bou di vigilansia di diferente organisashon manera Voogdijraad. Kenis Yolbana-Rodriquez a pidi komunidat di Kòrsou i tambe Korte djárason último pa stòp ku e situashon i dun’é su yu bèk. ‘Ami ta su mama!’ Te ainda tabatin dos kaso den korte tokante e situashon. Segun Aliansa korte a ninga di menshoná e mama den su veredikto. I ku esaki nan ta ninga e derecho humano di e mama.
Yolbana-Rodriquez ta haña sosten den su lucha for di Aliansa, pero tambe for di e ruman muhé di su kasá defuntu, ku ta Esther Maduro. Segun Maduro e kaso ta proba ku Korte i Ministerio Públiko (OM) na Kòrsou ta korupto. Segun sra. Maduro ‘nan ta yuda hende ku nan konosé, nan no ta wòri ku hende latino òf for di otro pais’. Sra. Maduro durante konferensia di prensa públikamente a hasi petishon riba e tutor, ku ta su subrina, pa duna e mama su yu bèk. Segun sra. Maduro e tutor tin bon kontakto ku instansianan manera Voogdijraad, i pa e motibu ei por keda ku e mucha.
Segun Jeanne Henriquez, presidente di Aliansa, su organisashon a aserká organisashonnan internashonal ku ta lucha pa derecho humano pa duna yudansa den e kaso di Cora. Henriquez a bisa ku outoridatnan konsekuentemente ta ninga derecho di e mama. ‘Ora e mama a bin Kòrsou den luna di yanüari i a mira su yu atrobe, for di basta tempu, un agente di polis a kita e yu for di su mama. El a bisa e yu ku su mama a bin for di Colombia pa bende e yu.’ Segun Henriquez e kaso ta proba ku tin hopi kos robes den nos institutonan. ‘Mester bin investigashon. Pa asina nos por protehá no solamente mama di Cora, pero tur e otro muchanan i mamanan ku ta víktima di inhustisia na Kòrsou.’ Segun Henriquez ta trata di un kaso di ‘sekuestro legal’. Tambe e ta papia tokante un situashon di ‘favoritismo’ di trahadó di korte, OM, i organisashonnan manera Voogdijraad. Henriquez: ‘E ta un situashon di ons kent ons. I esaki tin ku stòp.’