WILLEMSTAD.- Entrante awe djaluna 9 i djárason 11 di ougùstùs despues di mèrdia, tur e klientenan di Ministerio di Desaroyo Sosial, Labor i Bienestar , ku a risibí nan Karchi di Sosten nobo, por kuminsá usa esaki pa hasi kompra.
Primeramente riba djaluna 9, e grupo di 4000 klientenan di SOAW ku ta èks kliente di Rode Kruis i esnan ku ta tin Karchi Sosial/Karchi di Kuminda, por kuminsá usa nan Karchi nobo di Sosten.
E di dos grupo, ku ta 8000 kliente di SOAW ku ta kobra ònderstant, ku a risibí nan karchi nobo, por kuminsá usa esaki entrante, djárason mèrdia 11 di ougùstùs.
C-Post ta entregando karchi tur e dianan aki ainda. Ta importante pa e kliente ta na kas, pa por firma personalmente ora e risibí su karchi nobo. Huntu ke e karchi nobo, e klientenan lo risibí algun instrukshon i tambe un lista di establesimentunan na unda tur por usa e karchi nobo. Un dje benefishinan di e Karchi nobo di Sosten ta, ku por usa esaki na hopi mas tantu establesimentunan manera toko, Mini market i supermerkado.
Den e dianan tras di lomba, e Ministerio di Desaroyo Sosial, Labor i Bienestar a bin ta traha duru pa por introdusí e Karchi nobo di Sosten pa tur 12 mil kliente. Den e dianan ku ta sigui, SOAW lo sigui duna mas informashon i tene klientenan na altura di tur e desaroyonan rondó di e Karchi nobo di Sosten, via kanalnan ofisial di Gobièrnu i plataformanan di komunikashon di SOAW riba retnan sosial.