WILLEMSTAD.- For di e aña aki (2017) eks studiantenan lokal ku tin un debe serka DUO (Dienst Uitvoering Onderwijs) lo por paga nan debe bek riba un kuenta bankario na Kòrsou mes. DUO ta ofresé pa paga un montante fiho pa luna den florin sin ku nan tin di paga gastunan di transakshon. Asina DUO ta bisa den un aviso ku el a emití. Den e mesun rosea e instituto ta bisa si ku esaki ta ser ofresé pa un periodo di prueba di 2 aña, i ku tur esnan interesá lo por apliká pa esaki promé ku dia 15 di yanüari 2017. Pa mas informashon lo por bishitá e página wep di DUO ku ta www.duo.nl/antillen

Riba su página wep DUO ta splika ku e pago bek awor no tin mester sosodé riba un kuenta bankario Ulandes, sino ku por hasié riba un kuenta bankario lokal mes. Naturalmente tin di hasi e transakshon, pero lo no tin (kasi nada di) gastunan èkstra.

Tambe tin e posibilidat pa paga un suma fiho pa luna durante e dos aña di prueba. Naturalmente pa esei e persona lo tin di duna enkargo na su banko pa hasi e pagonan a base di un “standing order” pa evitá ku e ta lubidá. Riba e página wep tin posibilidat di inskribí via di e e-mail adrès: antillen@duo.nl

Tin di duna nòmber kompleto, direkshon, number di korespondensia, komo tema “lokaal terugbetalen 2017”. Esnan ku inskribí despues di dia 15 di yanüari 2017 lo por kuminsá te na 2018.

KALKULA SUMA

DUO ta hasi un kalkulashon di e suma ku e persona tin di paga bek den 2017 den e moneda lokal (florin). Na fin di yanüari 2017 e persona lo ser notifiká via e-mail kua ta e suma ku e tin di paga na florin, pero tambe na Euro si e ta deseá esei. Tambe e lo risibí e number di kuenta riba kua e plaka lo mester ser transferí.

PAGO NA TEMPU

Segun DUO, si pa mas tardá 30 di novèmber 2017 e no a risibí e suma total ku a kumbiní riba e aña ei, lo stòp ku e posibilidat pa transferí lokalmente. Esei ta nifiká ku e debe dje persona lo mester ser transferí pa un kuenta bankario Ulandes di DUO for di 2018.

E transferensia pa un kuenta lokal solamente ta posibel pa sumanan fiho den 2017. Den kaso ku e persona riba un pago atrasá e lo tin di hasi esei pa un kuenta Ulandes.