WILLEMSTAD.- Dr. Izzy Gerstenbluth no ta muchu kontentu ku e komportashon i aktitut den pueblo. Di un banda un komportashon ku ta sòru pa un oumento den e kantidat di kasonan di infekshon ku COVID, i tambe e aktitut di sierto gruponan ku ta inventando tur sorto di historia pa desanimá òf hinka spantu den otronan pa nan no bai vakuná. Ayera durante un enkuentro ku prensa ekstraordinario dr. Gerstenbluth a remarká bisando ku nos a yega un punto rèkòrt ku 506 kaso nobo di personanan infektá. Tin 53 hende ku entretantu a rekuperá i lástimamente tin 2 hende mas ku a fayesé. Te ku ayera tur tabatin 104 hende hospitalisá, i tin 32 hende den e sekshon di kuido intensivo.

E situashon ta super serio pa motibu ku tur e kamanan den kuido intensivo a ser okupá kaba. Pero esaki ta un situashon ku por a spera, pa motibu ku a atvertí for di aña pasá. A bisa ku lo tin di tuma medida promé ku mira ku e kapasidat di kuido ta na punto di ser surpasá. Nos ta einan awor!

Awor ku ta surpasando e kapasidat di kuido ta enserá ku di akuerdo ku e proyekshonnan, e tendensia aki lo no baha. Si tin 506 hende infektá, nan lo a infektá mas hende kaba. Si ta hende ku ta haña síntoma, na momentu ku esei sosodé ya bo a pega un kantidat di hende tambe. Loke el a indiká komo un dje situashonnan kaminda lo tabatin hopi infekshon ta riba dia di elekshon. No opstante ku a pidi partidonan pa evitá aglomerashon, tòg por a nota aglomerashon i hendenan bònchá riba otro huntu ku nan lidernan polítiko pa bai depositá nan voto.

Situashonnan manera eseinan tabata ideal pa a infektá otro, i sigur si tene kuenta kon e variante Britániko di COVID ta komportá su mes i infektá hendenan ku gran rapides.

Segun e epidemiólogo, e ta kere ku ainda nos no a mira e efekto máksimo di e infekshonnan, i e kantidat di hende ku ta keda interná no a yega su máksimo tampoko, e lo sigui subi. Awor, si e ta sigui subi i ya a alkansá e máksimo di kapasidat di kuido intensivo, ta nifiká ku nos por spera ku mas hende ta bai fayesé.

I esaki no ta debí na falta di kuido, ku e personal no ta hasi nan trabou. A hendenan ku ta trahando 24/7, maske nan por ta kansá nan ta sigui traha. Pero si e kantidat di pashènt ta sigui subi, no por evitá lo peor!