WILLEMSTAD.- Tur kos a kuminsá na momento ku habitante di un kas na Daimariweg a bai polis i hasi denunsia ku polisnan a tene entrada hudisial na su kas i bai ku sèn, sin e tende nada mas.

Despues di e denunsia aki  reshèrshinan a hasi un investigashon mas profundo i a realisá ku den e anochi di 17 te ku 18 di sèptèmber 2020, 6 agente a hasi nan mes kulpabel dor di bai na 6 diferente adrès i konfiská plaka, koka, mariwana algun artefakto pa “crush” mariwana, aparato di video sin traha prosèsverbal. Tambe nan a drenta e bibiendanan sin tabatin un “last”.

Asina kaso “Outpost” a inisiá di kual a detené e agentenan Dorand, Balijn, Overman, Janga, Rodriguez i Thomsjansen.

Despues ku Janga i Rodriguez a duna klaridat di e kaso i koperá ku hustisia, ámbos a keda poné den libertat pendiente tratamentu di e kaso integralmente.

Ayera ‘Outpost” a keda tratá pro-forma.

E agentenan ta keda akusá pa ladronisia den 6 diferente adrès pa malversashon, falsifikashon di dokumento i abuzo di poder komo polis.

E agente femenino Doran ta keda akusá tambe pa poseshon di droga.

Su abogado mr. Vaders a splika ku Doran a aseptá ku e tabata na sierto adrèsnan bèrdat i a atmití di a drenta sierto bibienda, pero esnan ku ta den libertat a hasi meskos.

Dorand a bisa ayera ku e ke bai serka su yunan pasó su mama so no por atendé ku nan.

Dado momento el a bira emoshonal ora ku el a bisa ku su yu tabata bayendo Havo, pero a baha di nivel debí na loke ta pasando. P’esei e ke pa hues lag’é bai kas, pa e por regla asuntunan di skol pa su yu.

Fiskal Leepel a bisa ku e akto aki ta unu ku a shòk komunidat i mas ainda ora e  tende algun agente ta deklará ku e nan no sa dikon nan ta será.  Segun fiskal esei ta un indikashon ku nan no ta konsiente di gravedat di nan akto.

Hues a rechasá e petishonnan pa libertat temporal.