WILLEMSTAD.- Por wak bèk riba un organisashon sumamente eksitoso di e konferensia di CLATE (Confederación Latinoamericana y del Caribe de Trabajadores Estatales) ku a tuma lugá na Kòrsou. Asina presidente di sindikato ABVO, George Herandez ta bisa. E ta basa su mes riba reakshonnan ku a risibí despues di e konferensia.
“Tur e delegashonnan a elogiá tantu e organisashon di e konferensia komo e trato risibí. Nan a keda enkantá ku Kòrsou”, Hernandez ta deklará pa EXTRA. E konferensia anual di CLATE tabata organisá pa sindikatonan ABVO, NAPB, SAP i STrAF i den kolaborashon ku Ministerio di SOAW i a tuma lugá di 28 pa 31 di mei na Renaissance Wind Creek Curaçao Resort.
80 representante for di 16 pais Latinoamerikano (Argentina, Uruguay, Brasil, Paraguay, Chile, Perú, Ecuador, Colombia, Venezuela, Costa Rica, Guatemala, El Salvador, México, Cuba, Repúblika Dominikana i Kòrsou) a presentá nan rapòrt, kual a resaltá e desafionan i logronan den nan paisnan, kontribuyendo na komprondementu kolektivo i planifikashon stratégiko di e konferensia. Tambe e konferensia a inkluí un homenahe emoshonal na Norita Cortiñas, un miembro fundadó di Madres de Plaza de Mayo, ku a fayesé na edat di 94 aña. Adrie Williams, èks presidente di ABVO ku ta un di e organisashonnan anfitrion di e konferensia, a duna informashon tokante historia di Kòrsou. El a papia tokante e luchanan pa libertat, igualdat i nan influensia riba moveshonnan di independensia den henter Karibe.
Tur e delegashonnan a aprobá unánimemente e ‘Deklarashon di Kòrsou’ manera lesá pa Juan Darío Fuentes di e ekipo presidensial di CLATE i Silvia Tejera, sekretaria general di ADEOM Uruguay. E deklarashon aki ta re afirmá e kompromiso pa metanan kolektivo di labor i ta suprayá e nesesidat di un estado demokrátiko i sosialmente hustu.
Larmonie-Cecilia
Minister di Desaroyo Sosial, Labor i Bienestar (SOAW), Ruthmilda Larmonie-Cecilia tambe e a re afirmá e kompromiso di gobièrnu di Kòrsou pa ampliá bienestar laboral i sosial, pa medio di fortalesé kolaborashon entre sindikatonan i gobièrnu. E minister a suprayá ku solamente enfokando riba diálogo i union por yega na benefisio sosial i pago adekuá.
Durante su diskurso Larmonie-Cecilia a enfatisá riba e intenshon pa pone Kòrsou riba mapa internashonal den e área di labor i haña rekonosementu global den sektor laboral. E minister a bisa: “E evento aki a re afirmá importansia di nos mishon konhunto i nesesidat pa sigui traha huntu pa derecho di tur trahadó. Individualmente nos ta pèrdí.” Despues di su palabra, presidente di CLATE, Julio Fuentes a ekspresá su gratitut pa e presensia di minister i a entregá un opsekio na nòmber di e konfederashon i a gradisié pa e solidaridat i fraternidat ku nan a risibí.
Larmonie-Cecilia a enfatisá ku e diálogo eksitoso i kolaborashon ku sindikatonan ku a promové e konferensia, ta un paso esensial pa logra mihó resultado sosial i pago hustu pa tur trahadó. E evento aki ta marka un avanse signifikativo den esfuerso di Kòrsou pa logra rekonosementu internashonal i liderazgo den relashon laboral.
Gobièrnu di Kòrsou ta keda dediká na enkurashá un ambiente di trabou inklusivo i hustu pa tur su siudadanonan, e minister a deklará.
