WILLEMSTAD.- Fondo di Kriminalidat lo ta mihó strukturá den futuro, e lo ta mihó organisá i hinká den un bachi legal. Esei di akuerdo ku Minister di Hustisia demishonario mr. Quincy Girigorie den deklarashon pa EXTRA. T’asina ku plakanan konfiská i tambe sènnan di but ta bai den e fondo aki i finalmente ta finansiá proyektonan di prevenshon ku ta keda evaluá dor di un komishon spesial. Pero segun e mandatario, un dje problemanan ku e fondo aki ta ku no tin konsistensia den e fluho di plaka ku mester tené na bida. E último biaha ku plaka a keda depositá den e fondo aki tabata na aña 2018. Na e okashon ei a depositá sènnan di but di añanan 2016 i 2017. E tempu ei el a suma un 900 mil florin, ku ta e suma di mas grandi ku e fondo a konosé.

Den fin di aña pasá e fondo a risibí un suma kuantioso di 12 mion pa por traha kuné. E suma aki lo ta disponibel pa por hasi uso di dje pa e próksimo añanan.

Pero segun mr. Girigorie, e tin tur konfiansa ku e próksimo titular di hustisia lo sigui ku e proseso i ku lo sòru pa komunidat tin un fondo di kriminalidat for di kual por finansiá proyektonan den kuadro di prevenshon.

Fondo di kriminalidat no a un fondo kaminda un minister ta disidí ki proyektonan ta ser finansiá for di dje, sin ku ta un komishon ta evaluá e petishonnan pa finansiamentu i a base di sierto kriterionan nan ta bini na remarke. E minister ta esun ku finalmente ta duna su aprobashon si.

Fondo di kriminalidat lo bai haña mas ‘body’, un bachi legal pa asina e ta mas fuerte pa evitá mal uso. Pa straño ku por parse, pero e fondo aki tabata eksistí sin ku tabatin palabrashonnan kla ki momentu e tin di risibí plaka, for di unda ni kuantu. Di forma insidental tabata depositá plakanan den e fondo.

Pero awor e lo tin un mihó struktura. Un eksperto finansiero lo traha riba e palabrashonnan ku OM. Dor ku no tabatin entrada fiho, no por a hasi muchu kos tampoko. E asuntu aki ta den su fase final. Hulanda a inkluí esaki den su “plan van aanpak” ku a keda aprobá. Tur kos ta indiká ku e fondo aki lo ta mas fuerte próksimamente.