Gerard: Kòrda duna koperashon

WILLEMSTAD.- Dia 26 di ougùstùs awor porfin ta kontinuá ku e trabounan pa pone infrastruktura di awa i koriente pa sierto kasnan den barionan di Klein i Groot Sta. Martha. Parlamentario pa partido Nashonal, Elvin Gerard ta hasi un apelashon urgente riba abitantenan pa nan duna nan ful koperashon pa e trabounan kana.

Gerard ta splika ku e trabounan a keda wantá último 6 pa 7 luna pa diferente motibu. Tabatin kontratista ku no por a traha nes pa pega kashi di koriente i meter di awa miéntras ku otro kontratista no tabatin e fondonan pa a kumpra e kabelnan di koriente.

Segun e parlamentario Aqualectra mes a disidí di kumpra e kabelnan i otro problemanan ku tabatin tambe a solushoná. Awor ta bai kuminsá ku trabou pa koba pa pasa kabelnan di koriente i pipa di awa i konektá tur e kasnan riba ret di Aqualectra.

“Ta spera ku pa fin di desèmber tur trabou ta kla. Esaki ta inkluso lusnan di kaya ku tambe Aqualectra lo pone na algun sitio pa asina tin mihó iluminashon anochi den bario ku ta kontribuí na mihó seguridat pa abitantenan.”

Gerard ta hasi un apelashon urgente riba abitantenan pa nan duna tur koperashon pa e trabounan tuma lugá. “Si tin kachó den kurá mara esakinan pa no stroba e trahadónan.”

Parti di e trabounan ta un kòntròl di e instalashon eléktriko di e kasnan. “E koriente di e kasnan no ta di kùr i Ministerio di Desaroyo Sosial, Labor i Bienestar (SOAW) a pone 1,3 mion florin disponibel pa kùr koriente di tur e kasnan.”

Segun e parlamentario ta importante pa kùr e i instalashonnan di koriente pa evitá kualke aksidente manera korto sirkuito ku por surgi. E ta spera ku abitantenan ta hasi uso di e oportunidat pa despues di hopi aña warda, porfin nan ta konektá riba ret di Aqualectra i nan tin nan sistema di Pagatinu i meter di awa inteligente instalá.

Gerard ta supliká e abitantenan pa e no mishi ku e kashinan di koriente pa despues nan no haña but di 5.200 florin serka Aqualectra. “Ora ei si niun hende no por yuda nan pasobra SOAW no ta paga but pa niun hende.”

E ta mustra mas aleu ku Aqualectra tambe lo duna informashon i instrukshon riba e trabounan ku ta bai kuminsá. Tambe Ministerio di SOAW ta pasa e abitantenan den un trayekto pa konsientisá nan riba uso responsabel di awa i koriente pa asina nan no haña nan ku debe.

Reda Sosial

Finalmente Gerard ta bisa ku Reda Sosial tambe tin atenshon pa e situashon di e kasonan. Tin algun ku ta den mal estado di mantenshon i ku abitantenan mester keda pendiente pa Reda Sosial sigui ku yudansa pa mantenshon di e kasnan.

Foto:

...Elvin Gerard...