WILLEMSTAD. - Tur kos a kuminsá ora ku outoridatnan a haña yamada di siudadano ku na un kas den Hispañolaweg lo tin hürmentu di kamber ku hende muhénan pa nan biba. Riba e notifikashon aki un tim grandi di diferente servisio a bai pa realisá investigashon. Un di e promé kosnan ku lo mester a keda investigá, ta si e persona ku ta hür kamber, tin pèrmit pa hür kamber. A resultá ku e señora doño di e kas no tin e pèrmitnan nesesario.

Nan a topa ku basta hende muhé den e kas ku ta paga 200 florin pa siman pa kada persona. E echo, ku e persona no tin pèrmit pa hür nada, a para e aktividat di hürmentu di kamber. E señora ku ta na kabes di e kas, i ku ta kobra ta  mesun persona ku algun siman tras di lomba a hür un restorant serka un chines i despues e señora a bai Kámara di Komersio i pone e negoshi riba su nòmber.

E loke ku outoridatnan a konstatá ta ku tin un grupo di hende muhé ku tabata tembla ora ku nan a mira tantu persona di hustisia den e kas. A resultá ku e hende muhénan aki ta keda tratá manera katibu. Si nan no paga e 200 florin pa siman, nan ta pèrdè derecho di baña. Esnan ku no por paga e 200 florin, i ku ta pèrdè derecho di baña ta baña e ora ei huntu ora ku un otro ku si a paga baña.

Tin un roster ku ta bisa ku kada dia un hende mester limpia kas. Outoridatnan a puntra e doño di kas ku si e ta trata e hendenan bon i el a bisa ku si. Pero tabata bisto ku tin hende hopi preokupá den e kas i ora ku outoridatnan a kuminsá interogá un di nan, el a kuminsá yora i sklama pa sak’é n’e momentu ei mes for di e kas ei, pa motibu ku e trato ku nan ta haña ta di un katibu moderno. Nan tin di kushiná, i tambe nan ta keda usa pa e señora su negoshi komo “trago meisjes” na un otro negoshi di e señora.

Esaki a pone ku outoridatnan a bai ku tur hende i lo wak kon ta skapa esnan ku ta legal aki na Kòrsou pa nan por yega nan pais bèk a base di nan mes petishon, i e otronan ku ta indokumentá tambe lo wak kon ta atendé nan asuntunan. Por a tuma nota klaramente ku vários di e hende  muhénan a haña un alivio ora ku nan a bai ku outoridatnan. E kaso aki ta den investigashon i lo no ekskluí mas aresto den e kaso aki.