Hunta komisario lo a para fuerte pa grupo lokal
WILLEMSTAD.-Informashon ku redakshon di EXTRA ta di dispone di dje riba e mainta aki ta indiká ku Konseho di Minister a keda di trata e proposishon ku Refineria di Kòrsou (RdK) mester a presentá pa loke ta e kompania òf kompanianan ku nan ta konsiderá esnan mas fuerte pa operá i manehá e refineria di Kòrsou.
EXTRA a komprondé ku despues di hasi nan análisis gerensia di RdK a bai su hunta di komisario pa presentá su evaluashon. Ta bon konosí ku vários kompania a mustra interes pa operá i manehá e refineria i na final a keda posponé e fecha riba kua mester a entrega un proposishon fiho. Asta te e último dia despues di tur e ekstenshon di tempu ainda a bolbe dos dia mas pa kaba di atendé tur asuntu.
EXTRA tin informashon ku aparentemente hunta di komisario no tabata muchu kontentu ku e proposishon original di gerensia. Esnan hopi yegá na e desaroyonan aki asta a indiká ku e direktor interino a bandoná e sala di reunion ku ekspreshon di kara niun tiki kontentu.
E informashon ta indiká ku hunta di komisario a para duru pa e konseho ku ta manda Konseho di Minister ta pa laga e grupo lokal CORC tuma operashon i maneho di refineria. E grupo lokal ku a konta ku sosten di un kompania petrolero grandi di Brasil, empresario lokal di renombre i tambe sindikatonan tin bendishon pa operá i manehá e refineria.
Konseho di Minister mester tuma e desishon final si ta bai di akuerdo ku e proposishon pa duna promé opshon na e grupo lokal i e di dos opshon na e grupo chines.
frida
Mi a lesa na FB ken e integrantenan di e grupo aki nan ta, i ku Sr. Gregory Elias ta esun ku ta representa nan. Ami no tin konosimiento di refineria pero mi tin un impreshon ku e hendenan aki tampoko ta tin e konosimiento ei.Mi tin e impreshon ku nan ke Kumpra barato,opera,inverti un tiki den e refineria dor ku esaki ta un manera di hanja akseso na e terenonan enorme di e empresa aki i mas laat eksplota i usa e terenonan ei pa kalke otro kos. Mi ta spera ku mi ta robes ku mi impreshon. Tempo ta bai bisa!