E luna aki, dia 8 di desèmber último Curtis Meris a selebrá 10 aña di a ordená komo saserdote. E tabata e promé pastor ordená den e pais nobo Kòrsou outónomo den reino. Curtis Meris komo pastor hóben. Ser pastor ta un trabou, pero kon e trabou aki ta hinka den otro. Esei ta loke pastor Curtis Meris a konta Djasabra, enfatisando ku no ta manera hende ta pensa ku e ta lanta mainta hinka rudia i resa te ora anochi sera. E ta hasi hopi i hasi hopi pa komunidat tambe.

Pastor i saserdote...

Na promé lugá e diferensia entre pastor i saserdote. Tin bia nos ta tende pastor i otro bia saserdote. El a splika Djasabra ku tin un diferensia entre pastor i pader. Saserdote bo ta usa pa tur dos, esta bo ta un saserdote pasobra bo ta ordená i ta parti di loke ta ta yama e saserdotenan. E palabra pastor hopi bia ta keda usá pa e pastor òf saserdote ku ta responsabel pa un parokia. I komo responsabel pa e parokia e tin e funshoná di wardadó òf pastor di e karnénan ku ta kuida nan. Pader no ta na kabes di un parokia. Tin bia e por ta asistí na un parokia i no tin un parokia mes i ta simplemente atministrá un parokia i no tin e funshoná di e ta pastor di e parokia.

Goso i legria...

“Mi a eksperensiá e 10 añanan ku hopi legria, goso pa motibu ku bo ta sinti ku realmente esaki ta loke bo a skohe i bo ta sinti bu felis aden. Esei ta un di e kriterionan ku bo tin di mantené semper den tur loke bo ta hasi pa sigurá ku bo ta felis den loke bo ta hasi. Tabata 10 aña di hopi legria i felisidat i 10 aña di hopi reto”, Pastor Meris a bisa.  Tabatin kosnan ku e mester a siña i dil kuné pasobra for di ora bo ta traha ku hende no ta fásil., Hende tin nan manera di ta i nan manera di pensa, inkluso e tin di manera di ta i mester purba drenta otro te otro logra un sierto sinkronisashon pa sigui padilanti huntu. Pero all by all 10 aña di legria segun pastor.

Eksperensia úniko...

E ta kòrda diferente kos ku el a ‘maak mee’ ku semper e kier a eksperensiá. Un di nan tabata bishitá Vatikano i el a hasié na diferente okashon inkluso e tabatin hopi deseo di keda den Vatikano mes i esei tambe a tuma lugá na mas ku 2 okashon. Aña pasá tabata esun ku tabata  e klímaks pe kaminda el a keda kaminda papa Francisco mes tambe ta kedando i na momentu di un di e momentunan di kome e ku papa tabata nan dos so pará na e mesa i papia ku otro. Esei ta algu ku a impreshoná pastor Meris pasobra no ta algu ku un hende ta eksperensiá asina fásil.

Funshonnan...

Meskos ku den tur trabou tin rango, den ser pastor tambe. Curtis Meris a splika ku tin 3 nivel den loke ta yama ordenashon. Bo ta diakono, saserdote òf obispo. Obispo ta e ordenashon klímaks. Bo ta alkansá komo e último ordenashon ku bo por haña. Pero den e trabou mes bo por atkerí sierto funshon ku obispo ta konfia na bo. Por ehèmpel tin vikario episkopal. Esei ta nifiká ku e persona ku ta un vikario episkopal ta karga e outoridat di obispo den un área di trabou spesífiko òf geográfiko. I asina tin diferente otro funshon den e trabou aki sea komo diakono saserdote obispo òf komo laiko.

Un dia komo pastor...

Pastor Curtis Meris a konta Djasabra un dia den su trabou. I no ta manera e persepshon por ta esta pastor ta lanta mainta hinka rudia hasi orashon te ora bira anochi. Resa bo ta resa semper segun pastor Meris. Den su kaso, e ta lanta mainta hopi tempran pa motibu ku e ta kuminsá gym 6 or. E ta lanta hasi orashon i gradesí dios pa e mainta nobo. 6 or e ta bai gym despues regresá, baña desayuná i kuminsá ku su trabou. E trabou por ta reunionnan òf kos pa traha na kas mes òf tambe tayernan di trabou ku e ta duna. E ta kòrda ku e luna aki el a duna tayer di trabou na Boneiru òf tambe tin otro tareanan manera den fundashonnan. E trabou ta varia inkluso e trabou ku ta hasi pa komunidat mes ku ta duna charla, duna santa olio, duna counseling, hasi orashon ku hende i hopi mas. E trabou ta poko difísil pa bisa ku tur dia kiko e ta hasi pasobra e trabou ta varia. Ta dependé kon su programa di dia ta e ta yen’é ku loke ta  e kosnan ku e tin di hasi. I meskos ku tur otro hende, pastor Meris tambe ta bai laman i no ku su paña largu di pastor bistí, pero ku su shòrt. Dependé kon su skema ta e por bai laman despues di gym. “Mi ta bai laman ‘netjes’, presentabel pasobra bo tin di landa i bo ta komportá bo mes normal meskos ku kualke persona”, pastor Meris a bisa ku un sonrisa riba su kara.

Ta mi hendenan...

I no solamente bai laman, pero tambe e sa bai eventonan públiko. El a yega di bai tumba i otro eventonan riba Brionplein. E sa haña invitashon di amistatnan serkano òf si e organisashon mes invit’é. Tambe el a yega di bai North Sea Jazz pa e skucha e artistanan ku e tabatin gana di skucha. E sa partisipá na aktividat asina no e frekuensia ku ta keda presentá den komunidat. Pero ta asina nos ta manera e kantika ta bisa....ta mi hendenan, si ta mi hendenan...generalisá kos ta mi hendenan.... mustra manera tur bia mi ta hasié, ta mi hendenan. Pero e ta bisa laga e hendenan pens’é numa.

Partisipá na e selebrashon...

Aktualmente pastor Curtis Meris ta enkargá ku parokia di Sta. Maria. Ta un parokia bon bishitá ounke unda ku e bai e ta hala hende. Sinembargo pastor Meris mes ta bisa ku esaki no ta e so pero tur su koleganan ta atraé hende i e amor ku pueblo tin pa nan saserdotenan i e amor p e trabou ku e saserdote ta hasi. Komo saserdote ta difísil pe bisa ku ta e motibu dikon hende ta skohe pa skohe un spesífiko pero pa nan komo saserdote importante ta pa e hende asistí na un misa, asistí na enkuentronan spiritual. E or ta sera dje òf otro kolega, unda ku e pueblo bai importante pa e bai un misa pa selebrá. E tin komo regla di bida ku e no ta papia riba komparashon. E ta generalisá pasobra e ta kere ku komparashon ta ladron di felisidat i stroba bu di focus riba bo trabou i focus riba e otro ta hasi. E no ta un hende asina i e ta kere ku e trabou di señor ta mas grandi ku ken Curtis ta, e mester por konvensé  e pueblo di tal manera ku asta e bai serka un saserdote ku kisas ainda no ta dominá e idioma papiamentu e hende ta bai pasobra e ta konvensí ku e tin di partisipá den e selebrashon di misa. kualke sea e pastor ku tei importante ta e tin di partisipá na e selebrashon di misa.

Predikashi di mi kurason...

E mensahenan ku pastor Curtis Meris semper ta presentá den su predikashinan ta sali for di su kurason, asina el a bisa Djasabra. El a bisa ku di su kurason i inspirashon. E ta papia hopi di su kurason, e ta papia di loke e ta kere i ta konvensí ku ta asina mester ta. E ta purba pa e sali di paden, loke e ta sinti ku e mester ta asina. I tin bia e ta sinti ku ora e ta papia manera tin un bos ta papia ku e ta prediká e no ta djis prediká pa e pueblo pero e ta prediká pa e mes skucha. E ta difísil pa e splik’e. Ta un inspirashon ku dios a dun'é ku e ta sosodé asina. E ta asina fuerte ku tin ora ora e ta papia e ke purba i ta manera ta dios mes ke papia via di dje pa konvensé su yunan ku ta esaki ta e kaminda di felisidat. Pastor Meris a bisa ku e ta asta sintié emoshoná ora  e ta splik’é, pero ta asina e ta sintié. E ta kere tambe ku dios ta papia ku nos. E ta kere Dios ta papia ku nos den nos kurason i nos tin di skuch’é i ta un portabos di loke Dios ta papia. Dios ta eksistí, e tei i su eksistensia no ta dependé ken ta kere den Dios òf no, sea bo ta kere òf no, Dios ta eksistí i e tei. E no ta kere ku Dios ta un Dios lehano pero ta un Dios hopi serka. E ta asina serka ku si bo apresiá silensio, di mente alma i kurason bo por sinti ku serka bo Dios ta. Pastor Curtis Meris ta konvensí ku ta asina.

2020 tabata un aña di lès...

2020 tabata un aña di hopi reto. Pa Pastor Curtis Meris aña 2020 tabata un aña eskolar di Dios. Dios a skohe pa aña 2020 ta e aña di lès. Pa siña mundu para ketu i balorá kosnan esensial ku hopi bia nos a laga nan pèrdè nan sentido di balor. Por ehèmpel e sentido di serkania, e sentido di tene man, e sentido di brasa inkluso den kasnan di famia ku nos mayornan hopi di nan no ta brasa nan yunan asina tantu, no ta duna nan yunan man asina tantu, nos ta asina alegá di otro. I dios a usa e mesun alehamentu aki pa yuda nos balorá serkania. I balorá serkania no komo algu ku bo ta balorá sin mes, pero balorá komo e oportunidat pa ora bo ta sera di e hende bo ta serka ku mente i kurason pa wak pa e hende ta bon pa kuida e hende pa sigurá ku e hende ta salú no físikamente so pero spiritualmente tambe. Aña 2020 ta un aña di lès i probablemente 2021 lo bira un aña di lès tambe i kisas asta di evaluashon. Kaminda Dios ke wak si nos a tuma e lès na serio, kon nos a bai biba, kon nos a bai dil ku e lès ku dios a duna nos. Ban hasié bon pa sigurá ku no ta bin un lès mas fuerte ainda. Esei segun pastor Meris tabata 2020 i 2021 lo bai ta, Ta e deseo pa 2021 ta mas suave pa nos hende por yega na trankilidat i disfrutá di e loke Dios a permití nos siña. Pa iglesia e tabata un reto pasobra mester a hasi diferente adaptashon, den kantidat di hende, den maneho di higiena i adaptashon ku a inkluí nan manera di dil ku sierto aspektonan spiritual manera parti komunion. Bo serkania ora ta hasi orashon, e manera ora ta bai duna hende santa olio, el a impaktá asta nos propio eksperensia di fe i e manera kon ta biba nos ritualmente di fe.

Pone esaki den kader

Djasabra te promé siman di yanüari

Djasabra ta klousurá nos programanan i páginanan di e forma aki, Ku palabranan di Pastor Curtis Meris. Ku 2020 ta un eksperensia pa nos i ku 2021 lo ta unu mas suave. Bon Pasku i Bon Aña Nobo di nos tur ku ta produsí Djasabra semanalmente. I tur ku ke sigui trese positivismo dilanti den 2021 nos tei valesca@extra.cw