WILLEMSTAD.- E situashon dje merkado di bibienda ta un preokupashon pa Fundashon pa Konsumidó. T’asina ku resientemente e fundashon a dirigí un karta ofisial na Parlamento ku e petishon pa e órgano aki tuma medidanan struktural pa yega na un merkado di bibienda pagabel, i tambe pa modernisashon di e ordenansa di hür. E fundashon ta bisa den su karta ku e tin di ekspresá su preokupashon kresiente riba disponibilidat di kasnan pagabel na Kòrsou. E preshon riba merkado di bibienda ta subiendo i kada bes tin konsekuensianan mas grandi pa e konsumidó, hürdó, esnan ku ta buska kas, hóbennan, famianan, grandinan i esnan ku ta biba nan so.

Segun e fundashon, su preokupashon no ta basá solamente riba señalnan general for di komunidat. Regularmente e fundashon ta risibí kehonan konkreto di e konsumidó riba disponibilidat, kondishonnan di hür i kas pagabel. Banda di esei tin tambe kasonan ku Huurcommissie Curaçao ta manda pa Fundashon na momentu ku e konsumidó tin mester di informashon adishonal, sosten òf guia. Tur esakinan ta suprayá e urgensia pa un aserkamentu struktural i koordiná. Mas i mas habitante ta indiká ku nan no por haña kasnan pagabel, ya ku tantu tarifanan di kas pa kumpra i kas di hür a subi drástikamente. Den kaso di kasnan di hür Fundashon ta nota ku e subida di preis tin hopi di haber ku desaroyonan riba e merkado liber, sin ku ta tene sufisiente kuenta ku e kapasidat finansiero di hürdónan òf a base di kriterionan kla i ophetivo. Debí na esaki e kostonan di bibienda por sali for di balansa kompará ku e entrada, i asina ta surgi e riesgo ku esnan ku ta hür kas no por keda den e kas mas.

Mas aleu e fundashon ta bisa ku, un bibienda no a solamente un bien ekonómiko, pero tambe un nesesidat esensial di bida i un parti importante dje seguridat di eksistensia. Ta p’esei ta di gran importansia ku habitantenan di Kòrsou ta keda ku akseso na bibiendanan pagabel i ku e konsumidó por konta ku sufisiente protekshon kontra subidanan irasonabel pa hür di kas, inseguridat i desaroyonan spekulativo riba merkado di bibienda.

Banda di tur esaki Fundashon pa Konsumidó ta preokupá ku e kompra kresiente di kasnan na Kòrsou dor di personanan ku no ta biba aki di forma permanente. Tin di rekonosé ku invershonnan di eksterior por tin un kontribushon positivo riba nos ekonomia. Pero na mes momentu e fundashon ta kere ku ta nesesario pa investigá te kon e kompra na gran eskala dor di no-residentenan ta kontribuí na e preshon riba merkado di bibienda, e subida di tarifanan i e akseso limitá pa hendenan lokal ku ta buska un kas.

(Foto File)