WILLEMSTAD.- Entrante djamars 29 di yanüari 2019 e tarifa regulá di gasolin i diesel lo baha na Kòrsou. Tambe tarifa di awa i elektrisidat lo baha entrante djabièrnè 1 di febrüari 2019. Esaki Bureau Telecommunicatie en Post (BT&P) ta partisipá den su informe mensual riba e partikularidat aki. BT&P ta supervisá e desaroyo di preis di produktonan petrolero i di utilidat.

Kálkulo tarifa produktonan kombustibel

E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Márgen pa Curoil, 5. Surplus/Défisit (Recovery), 6. Supsidio krusá, 7. O.B. di 6% pa benta por mayor, 8. Márgen pa agente i 9. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé shete komponentenan miéntras ku e tarifa pa benta por detal (na usuario final) ta inkluí tur nuebe komponente. Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa febrüari, ta basá riba Curoil su fakturanan di kompra di dezèmber. Ta revisá e preisnan di kompra akí pa medio di notashon di preis internashonal. Ta tene kuenta tambe ku otro eventual gastunan, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Surplus/Défisit’.

Durante luna di dezèmber Curoil no a kumpra ni Mogas 95, tampoko Gasoil LSD. Pa Gasoil LSD esaki ta usual pa motibu di e oumentu disponibel i ariba e importashon di e produkto kumbiní. E bahada di e tarifa di usuario final pa Gasoil LSD ta tambe prinsipalmente e resultado di e bahada den e korekshon den e komponente Surplus/défisit. Relashoná ku Mogas 95 a tuma e desishon pa ahustá e preis di kompra regulá abou na man di e desaroyo di kotisashon internashonal. Kálkulo tarifa awa i koriente E kálkulo di e tarifa pa awa i elektrisidat tin dos komponente: e tarifa básiko i e klóusula di kombustibel. E klóusula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku terseronan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sinembargo, kada luna e uso di e diferente medio pa produkshon, e asina yamá ‘meskla di produkshon’ ta varia. P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di febrüari. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di dezèmber. BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc. E bahada di tarifa pa awa i elektrisidat ta kousá prinsipalmente dor di e preisnan di krudo ku ta bahando i un bahada den e faktornan di korekshon di awa i elektrisidat ofer di e luna di dezèmber komo konsekuensia di e desviashonnan den e produkshon miksto realisá. Na dezèmber e mulinanan di bientu i CUC ku den e luna ei a konosé un produkshon di gastu relativamente abou, por sierto e suministro di elektrisidat tabata mas di lokual a pronostiká. Aprobashon i fihamentu BT&P ta asesorá Konseho di Minister (KdM) enkuanto e tarifanan nobo. Solamente despues ku e KdM aprobá e proposishon, e Minister pa Desaroyo Ekonómiko, ku a la bes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor BT&P ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontinuo i rasonabel.