WILLEMSTAD.- Bureau Telecommunicatie & Post (BTP) ta informá e adaptashon den preis di produktonan petrolero ku ta drenta na vigor entrante 30 di òktober 2018, pues otro siman djamars. Ta bon pa informá ku preis di gas di tantu e bòter di 100 lbs komo e bòter chikí di 20 lbs no ta kambia pa e temporada ku ta bini. Entrante 30 di òktober pues gasolin ta baha miéntras ku diesel ta subi sèn.

BTP ta informá ku gobièrnu ta obligá na hasi adaptashon mensual di e tarifanan di usuario tur esaki teniendo kuenta ku e fluktuashon frekuente riba e preisnan di petroli internashonal. Gasolin Mogas 95 te ku 29 di òktober ta kosta na pòmp Fl 2.015 pa liter i diesel ta kosta Fl 1.498 pa liter. Manera indiká kaba preis di gas no ta kambia. E preis di gas di 100 Lbs ta keda Fl 65.00 i e bòter chikí di 20 lbs ta keda kosta Fl 13.00. Entrante djamars 30 di òktober gasolin ta baha i bira Fl 1.995 pa liter i diesel ta subi i bira Fl 1.569 pa liter.

E splikashon ku BTP ta duna ta ku e bahada di e preis di gasolin ta prinsipalmente e resultado di un bahada den e komponente surplus/défisit, miéntras ku e subida pa loke ta trata preis di diesel ta debí prinsipalmente na e resultado di un subida di e preis di kompra i un bahada di e korekshon den e komponente surplus/défisit.