WILLEMSTAD.- Aunke lo ta un tiki prematuro pa bisa, pero si e situashon dje pandemia di COVID kontinuá riba e ritmo ku e a bayendo, e lo por bai hasi impakto grandi riba fondonan di SVB. Esei EXTRA por a komprondé for di kòmbersashon ku un representante dje entidat aki. T’asina ku komunidat tin un aña kaba luchando kontra e pandemia aki, tabatin un kantidat di hende ku a keda infektá, sinembargo e kantidat di hospitalisashon a keda relativamente abou aña pasá i tambe e kantidat di morto.

Pero awor na prinsipio di aña ku komunidat ta ser konfrontá ku un variante nobo i ku ta mas peligroso, tantu e kantidat di hende infektá, e kantidat di hospitalisashon komo e kantidat di morto ta subiendo drástikamente. EXTRA a komprondé pa SVB ainda ta poko prematuro pa hasi un kalkulashon i kuantifikashon dje gastunan ku esaki a trese kuné kaba i ku lo bai trese den futuro. I esaki ta sin konta ainda ku SVB ta pagando e presupuesto di CMC.