WILLEMSTAD.- Premier Eugene Rhuggenaath ta satisfecho i gradesido na e grupo grandi den komunidat di Kòrsou ku ta komportá, tene nan mes na e reglanan di distansia i tambe higiena. Na opinion di premier Rhuggenaath e manera ku e desaroyo ta bai ta mustra ku nos ta bai den e bon direkshon i e ta spera ku e desaroyo por sigui positivo di manera ku un dia por bai bek na situashonnan mas normal. Premier ta konsiente ku hopi hende ta kansá kaba di Covid, e tambe, sinembargo Covid tei pa keda i mester siña biba kuné.

Mester keda tuma e medidanan pa prevení miéntras ku no tin un kura òf remedi kontra Covid-19. E mihó remedi segun tur eksperto ta pa tene distansia sosial i praktiká higiena. Sinembargo lamentablemente ainda tin hende ta kere ku e vírus lo no afektá nan ni nan sernan kerí, meskos ainda tin hende ta pensa ku mihó nan gosa awor aki por si akaso mester bolbe introdusí un ‘lock down” kompletu atrobe. Un bia mas promé minister a enfatisá ku tuma vitamina òf kome sierto kuminda no ta yuda kontra Covid. E mandatario a keda sumamente kontentu di mira na Marchena kon un grupo tabata sinta hunga dominó pero tur tabatin tapa boka bisti. Mas aleu premier a indiká ku a yega tempu pa e komunidat aki bai stabilisá i balansá den e lucha i atendementu ku Covid. Mester stabilisá i balansá e parti di ekonomia, kuido médiko i tambe enseñansa. Den enseñansa ta importante pa kuida e muchanan i tambe tur trahadó den enseñansa.

E sifranan real ta mustra hopi bon kiko ta e situashon den enseñansa. Tin 30.748 mucha den enseñansa di kua 47 mucha ta positivo. Esei ta nifiká ku ta alrededor di 0.1% di muchanan ta infektá. Pa loke ta trata trahadónan den enseñansa e sifranan konkreto ta mustra ku tin 2400 trahadó di kua 6 kaso ta positivo. Esei ta representá 0.2% di trahadónan ta positivo. E malesa bou di mucha NO ta severo. Mas detaye den edishon di EXTRA.