Preferensia pa grupo lokal!?

WILLEMSTAD.-Awe na dos siman ta 5 di òktober 2020. Esei ta e fecha riba kua tur esnan ku a mustra interes pa partisipá den e proseso pa atkerí operashon i maneho di e refineria di Kòrsou mester entregá nan plan i oferta, esta e asina yamá ‘non-binding proposal’. Manera EXTRA a informá ku tur detaye tin un grupo lokal ku a indiká ku nan tin sosten finansiero amplio pa tuma e refineria over. Nan a papia personalmente ku premier Rhuggenaath riba esaki. Den kombersashon ku EXTRA a sostené ku sr. Rhuggenaath el a indiká ku mester warda dia 5 di òktober kaminda e grupo lokal huntu ku otronan mester entrega nan plan i oferta.

E grupo lokal konosí bou di e nòmber CORC, ta konsistí di entre otro sindikatonan APRI i PWFC, empresarionan lokal di gran reputashon e.o e kontratistanan mas grandi i tambe empresarionan ku konosementu finansiero internashonal. Tambe nan tin aliansa ku un kompania brasilero grandi internashonalmente. CORC ke tuma over mesora pa asina kuminsá ku e trabounan di mantenshon promé ku yega asina leu pa e refineria por start. Spesialmente representashon di trahadónan tin miedu ku por sigui rèk kakiña ku e proseso anto na desèmber 2020 ora ku no tin klaridat ainda, ku CRU lo bolbe manda basta hende kas sin perspektiva. Tin 32 mion dòler kla pa kuminsá ku trabounan di mantenshon loke ta enserá sufisiente trabou pa tur 7 kontratista di mas grandi. Aparte di esei e grupo a duna garantia di salario pa e trahadónan di isla tambe.

Manera indiká EXTRA a papia ku premier Rhuggenaath i a puntra su pensamentu si akaso por duna e grupo lokal preferensia komo ku nan ke drenta i tuma over mesora pa di e forma ei salba mas kupo di trabou posibel. Premier a duna di konosé ku si tin un proseso di lisitashon (bidding) ta kanando, den kua e grupo Corc tambe ta partisipando, mester duna espasio pa den e prosedura tur e partisipantenan kumpli ku e deadline stipulá.

Djaluna 5 di òktober ta un di e flechanan importante den e trayekto aki. Na opinion di premier Rhuggenaath, lo no ta prudente pa Refineria di Kòrsou (RdK) bai duna preferensia na e grupo lokal aki ni na otro grupo. No mester lubida ku den pasado ta kosnan iregular a sosodé ku a pone ku  e ‘preferred bidder’ a legumai tur negosiashon pa tuma e refineria.