WILLEMSTAD.-Premier Rhuggenaath durante di e briefing awe djaluna 21 di desèmber a anunsiá ku manera primintí a hasi un evaluashon di e medidanan ku ta na vigor. E evaluashon no tabata serka ministernan so, pero tambe ku partisipashon di otro disiplinanan. Despues di e evaluashon a yega na e konklushon ku tur e medidanan ku ta na vigor awor aki lo keda na vigor te ku 11 di yanüari 2021. Premier ta bisa ku nan ta konsiente ku hustamente den dianan di fiesta ku ta na kaminda, si suavisá esei lo nifiká ku oumentu di kontagio ta praktikamente sigur. Premier ke evitá ku Kòrsou ta suavisá prematuro ku konsekuensia ku esei lo kondusí na medidanan mas severo, manera lockdown. Ya kaba tin vários pais manera Ulanda, Alemania, Gresia i Mexico ku a hasi tur manera pa evitá pero obligatoriamente nan a bai den lockdown.

Gobièrnu ta papiando ku operadónan di kasino pa wak kon por yega na palabrashonnan pa nan tambe por kuminsá operá, bou di sierto kondishonnan.

Dr. Izzy Gerstenbluth a informá ku tin 27 kaso nobo i 8 kaso a rekuperá. Tin 7 pashènt di Covid den kuido intensivo. Den e kontrolnan ehersé pa polis, MEO i otro gruponan mas ku 50% di establesimentunan ku a faya ta relashoná ku alkohòl. Tin asta kaso kaminda MEO i otronan a bai 4x na e mesun negoshi ku ta sigui faya ku lei.

Mas detaye den edishon di EXTRA