WILLEMSTAD.-Hopi siudadano i medio di komunikashon a ripara ku direpente tin un nivel di seguridat ekstremadamente haltu rondó di promé minister Pisas. EXTRA a aserka Ministerio Publiko anteriormente i den un prinsipio a splika ku komo ku ta trata asuntu di seguridat di premier nan lo no bai duna komentario riba e asuntu.

Sinembargo e kaso ta hala atenshon den un komunidat asina chikitu manera Kòrsou ku hendenan ta tuma nota ku tin algu hopi straño den e manera ku ta move i transportá nos promé minister di un sitio pa otro. Den un prinsipio tabatin indikashon ku e protekshon èkstra lo tin di aber ku e kaso di ENNIA i refineria, pero finalmente OM su bosero a splika ku e situashon di konflikto den region di Gaza, ku Palestina i Israel ta motibu pa preokupashon mundial. Apesar ku Kòrsou semper ta konosí komo un teritorio di pas, tòg lo a bini indikashon ku mester duna mas protekshon na promé minister.