WILLEMSTAD.- Gobièrnu di Kòrsou ta spera ku komunidat di Kòrsou ta demonstrá un mihó komportashon ante e toke de keda ku a keda dekretá. “Laga nos no bagatelisá e loke tin na kaminda”, asina Promé Minister di Kòrsou, sr. Gilmar Pisas a duan di konosé durante e relato di dia djawe tardi. Segun sr. Pisas, komportashon ta algu importante, i gobièrnu no tin ningun klase di plaser pa imponé medidanan miéntras ta warda e posibel tormenta yega. Pero ta parse ku na momentu ku medidanan ser anunsiá, tin hendenan ta bai hasi nèt kontrali. No por t’asina ku meimei di un toke de keda tin supermerkadonan habrí ainda. No ta e mihó manera di respetá lei.

Segun sr. Pisas, a kambia e orario di toke de keda debí na e situashon di wer ta kambia konstantemente. I ta importante pa informá ku e sistema di disturbio mes no a yega ainda. Tur kos ta indiká ku e lo bira un tormenta tropikal i ku e lo haña e nòmber di “Bonnie”. Awaseru ta kayendo di forma moderá, pero esei no ta nifika ku e ta ménos menasante ku un tormenta tropikal. E informashonnan ta indiká ku e lo ta mas largu na durashon. I no laga nos asumí ku nada ta pasa, pasobra e parti mas pisá no a yega ainda. Ta bai tin mas awaseru, segun notifikashonnan di e Sentro Nashonal di Orkan na Merka i tambe mas bientu.

Segun e mandatario, e funshonnan vital ta e únikonan ku lo por ta riba kaya na momentu di un toke de keda. El a bolbe hasi un apelashon pa tur hende keda den kas pasobra segun e ultimo informashonnan, e loke ta na kaminda lo por tin un impakto basta grandi, pues “laga nos no bagatelisá e loke tin na kaminda”. Finalmente e mandatario a bisa ku e tim di krísis a reuní i ku tur kos a ser poné disponibel pa aktua den kaso ku ta nesesario.

Servisio Meterológiko

Di su parti e representante di Meteo, sr. Marshandy Luciano a splika ku pa 3or djatardi e disturbio tabata na 140 km leu for di Kòrsou i ku e lo sigui move den direkshon wèst. Na momentu ku e yega zuit di Aruba e lo por intensifiká i kombertí den un tormenta tropikal. Ne momentu ei e lo haña e nòmber di “Bonnie”. Loke Meteo ta hasiendo ta di vigilá e kondishon di tempu, ademas tin imágennan di radar. E disturbio aki ta basta grandi i ainda e parti patras ta kontené hopi awaseru, ta p’esei e ta pone enfoke riba posibel bientunan di tormenta. E avion spesial ku ta bulando meimei di e sistema a topa ku bientunan di 90 km/ora, pues e pronóstikonan ta pa bientunan di tormenta, for di awor te ku 8or djanochi.