WILLEMSTAD.-Premier Gilmar Pisas den presentashon na prensa lokal a duna di konosé ku gabinete Pisas ta lomba kontra muraya i p’esei a bai di akuerdo ku e proyekto di lei di COHO. Premier a splika e trayekto ku a kana for di un prinsipio ku su gabinete e asumí poder te awor. Awe mainta 7’or Konseho di Minister di Kòrsou a reuní i a yega na desishon ku ta aseptá e COHO 2.0 i a informa sekretario di estado Raymond Knops di esei.

Manera EXTRA a informa mas tempran, Konseho di Minister di Reino a skòrs tratamentu di COHO pasobra Kòrsou a bisa di no ta di akuerdo ku e COHO 2.0 miéntras ku algun siman promé promé minister Pisas a saka un deklarashon konhunto den kua ta bisa ku ta bai di akuerdo.

Premier Pisas a splika un ratu pasa ku mester a pone den balansa e outonomia kontra e bienestar i nesesidat di e pueblo aki.

El a menshoná ku si no bai di akuerdo ku COHO esei lo nifiká ku lo no por kubri e défisit di 90 mion pa luna. Lo mester sera e portal di NOW mesora i esaki mester keda será. 11 mil hende ku mester haña karchi di kuminda tambe lo no haña e karchi mas, ademas mester imponé medidanan drástiko den salubridat. Hopi ámtenar lo mester bai kas i ya kaba a ripara ku den kaso di 15 ámtenar na Ontvanger ta kuantu konmoshon esei a generá. Tur esnan ku ta entrega servisio i produkto na gobièrnu lo no por haña pago i tambe lo mester stòp ku invershonnan ku gobièrnu ta hasi i pa kolmo refineria tambe ainda no ta drai. Pues gabinete Pisas ta lomba kontra muraya i pesei a aseptá COHO 2.0. mas detaye den edishon di EXTRA.