Echo ta ku mayoria den hospital no ta bakuná!

WILLEMSTAD.- Minister presidènt Pisas den un konferensia di prensa ku a trata e sirkunstansianan rondó di e pandemia di Covid a mustra riba aspektonan importante ku hinter komunidat mester tene bon kuenta kuné. Sr. Pisas a mustra riba e rekursonan finansiero i rekurso humano ku Kòrsou no tin na e momentunan aki. Siguientemente el a para ketu na esnan ku ta keda infektá i tambe na unda e kontagio ta tuma lugá. Finalmente a trata e parti kon mester sigui den e pais aki. Tantu minister presidènt Pisas komo epidemiólogo dr. Gerstenbluth a mustra ku ta sumamente importante pa frena e kantidat di kontagio di kasonan di Covid ku ta tumando lugá den e pais aki.

Den hospital tin 23 hende infektá ku Covid interna. E ola di Covid ku a ataka Kòrsou ta sigui kontagiá hende miéntras ku e yudansa di hende i plaka ta kabando. E kontrakt di e hendenan ku a bin yuda ta kabando i no tin sèn pa renová esaki. ‘Si nos no demostrá ku por atendé ku e pandemia aki nos lo tin hopi problema”, asina premier Pisas a bisa. Den mesun rosea el a indiká ku e hendenan ku ta trahando den kuido intensivo i otro partidonan di hospital ku ta trata pashèntnan di Covid ta hopi kansa tantu físikamente komo mentalmente, sinembargo kantidat di hendenan ku ta bai hospital ta sigui subi. Premier Pisas a bolbe enfatisá ku si nos no kanalisá e situashon ku nos ta aden bon esei lo nifiká hopi problema pasobra tin ménos hende pa duna e trabou di kuido. Ta bin aserka ku situashon finansiero di pais ta laga di deseá.

Di forma enfátiko minister presidènt a bisa ku tin hopi diskushon riba bakunashon si òf no, pero echo ta ku e porsentahe di personanan interna den CMC pa Covid mayoria no ta bakuná. Esnan ku a muri resientemente tampoko no ta bakuná. Pisas a pidi pa esnan ku malesa króniko pa kuida èkstra.

‘Nos mester protehá nos mes dòbel”. Bakuna no ta garantia ku hende no ta keda infektá pero e bakuna ta pone ku e hende ta bira haña e malesa ménos serio. Mester evitá aglomerashon i aki sr. Pisas a hasi apelashon riba hendenan ku ta bai Saliña i Sta.Maria pa evitá aglomerashon.

Pa loke ta trata farándula el a indiká ku no ta bai sera farándula, sinembargo tur hende mester tene mas disiplina pa kuida otro. Ademas Kòrsou no tin nodi di sera, pasobra si Kòrsou no sera ta otro paisnan ta pone barera pa nan hendenan bishita Kòrsou. E wikènt aki ta evaluá kon mester sigui den farándula. Pa loke ta trata ‘contact tracing’ sr. Pisas a hasi apelashon pa koperá i duna informashon. Si ta serka byside a pega ku Covid mèldu esei na esnan ku ta investigá. No ta bai buska selashi di niun hende pero e informashon ta importante pa sa kon por aktua mas dirigí.

Pisas a sera ku un nota positivo indikando ku den yüli Kòrsou a kibra record den kantidat di turista ku a bishita nos pais. Mas detaye den edishon di EXTRA.