Toque de queda di 9’or pa 11’or anochi

WILLEMSTAD.-Gobièrnu di Kòrsou pa medio di premier demishonario Eugene Rhuggenaath a anunsiá suavisashon di medidanan. Unu ku sigur hopi hende tabata pendiente di dje ta e ‘toque de queda’. E suavisashon di medidanan ta entrante djarason 19 di mei 2021. ‘Toque de queda’ ta bai mas lat. Na lugá di 9’or anochi e ‘toque de queda’ ta kuminsá 11’or anochi. Di e forma aki Kòrsou ta habri bek di forma responsabel.

Tur loke ta bar, snek, beach clubs etc. tur por ofresé servisio te 8’or anochi. Sine tambe por habri pa publiko te 10’or anochi, trùk di pan tambe te 10’or anochi solamente ku trùk di pan mester entrega na kas òf curb side. Playanan tambe ta habri ku tur hende por bai landa for di mainta te 8’or anochi, pero evitá aglomerashon. No ta permití bbq ni fiesta na playa. Deporte tambe por kuminsá atrobe den aire liber ku publiko. Pero deporte den aire paden si no por tin publiko.

Dr. Jerry Semper a anunsiá ku pa loke ta trata bakunashon tin dos grupo nobo ku tambe por bakuna. Ta trata aki di e grupo di hende muhe na estado ku tambe por bakuna. E di dos grupo ta hóbennan di 16 i 17 aña di edat. Djamars ta último dia ku Sambil ta funshoná komo sentro di bakuna, esnan ku sita mester bai WTC. Mas detaye den edishon di EXTRA.