Sindikato enseñansa lantando pániko ta kousa muchu mas daño

WILEMSTAD.-Den konferensia di prensa di gobièrnu dr. Izzy Gerstenbluth a trese e sifranan pa loke ta trata Covid-29. Ayera a test 1017 hende di kua 224 hende a test positivo, 50 hende ta hospitalisá, tin 1642 kasonan aktivo i 27 morto te ayera. Gerstenbluth na forma enfátiko a splika ku e test den kurá di hospital no ta pasobra no tin lugá den hospital, pues no plama pániko.

Premier Rhuggenaath a duna di konosé ku e tim di epidemiologia i e tim di krísis ta kontrolando e situashon di Covid. El a yama danki na komunidat ku a reakshoná bon na momentu ku a drenta e ‘lockdown’. Ta atendiendo e kantidat di petishonnan pa eksonerashon ku a drenta, vários hende a risibi nan eksonerashon kaba. Tin organisashonnan ku no mester di eksonerashon manera polis, trahadó di hospital, brantwer i otronan. Yamada na tur piskadó i kriadó di bestia pa nan tambe regla nan eksonerashon.

Premier a indiká ku e situashon di hospital ta birando unu hopi serio i asta kritiko. For di un prinsipio a indiká ku e situashon den hospital ta un di e kriterionan pa monitor e situashon na Kòrsou.

Mas aleu premier a duna di konosé ku minister Croes ta den deliberashon ku direktivanan di skol i tambe dosentenan pasobra e kuido di maestronan i muchanan ta importante. Rhuggenaath tabatin palabranan hopi fuerte den direkshon di e sindikato DOEN ku “pa su motibunan” ta plama pániko den enseñansa i den hinter komunidat. Premier a indiká ku nèt na e momentunan aki e manera di aktua di DOEN no ta yuda e kousa pero ta kousa mas daño ku e ta hasi ta bon. Premier ta pidi pa tur hende keda kritiko, pero mester tene kuenta ku otro aspektonan. Mas detaye den edishon di EXRA.