WILLEMSTAD.- ‘The Suit Ocean Team’ ku orguyo ta anunsiá première di e pelíkula produsí lokalmente “Curaçao Underwater Kunuku”. Riba dianan 18 i 19 di desèmber The Suit, komo un personahe fiktisio den e pelíkula, lo hiba bishitantenan den The Movies na Otrabanda den un biahe espektakular kantu i bou di laman pa atmirá e bunita espektákulo ku por mira bou di awa serka di nos kosta parti sùit di Kòrsou.

Dia 30 ougùstùs 2019 The Suit Ocean Team, a baha na awa na Oostpunt, i a snòrkel durante di 8 dia den un biahe bou di laman direkshon e punta mas wèst i nort di Kòrsou. The Suit Ocean team a hasi grabashon di masha hopi ora pa dokumentá e bida espektakular ku tin bou di awa serka di kosta sùit di nos isla. E rekorido  supmarino tabata unu di mas o ménos 100 km. Di tur e grabashonnan a produsí un dokumental ku su meta no ta di hasi ganashi.  E produkshon a ser realisá pa Lawrence Mensa Foundation (LMF). Meta di e dokumental ta pa laga públiko mira ku por atmirá e bida bou di awa ku un dùikbrel i snòrkel i no nesesariamente mester ta un buseadó ku ta baha na profundidat pa disfrutá di esaki. Ku e film aki LMF ta spera di alabes aportá na atraé mas turista na nos isla, pa den seno di famia i amistat, disfrutá di Kòrsou den diferente aspekto. E enfoke ku e proyekto ta pa tira lus riba bida bou di laman serka di kosta sùit.

Ta e intenshon pa den un futuro serkano instansianan manera CTB i CHATA hasi uso di e dokumental komo un produkto pa merkadeo di Kòrsou komo un isla di hopi diversifikashon i atraktivo pa pasa dianan di vakashon i hasi negoshi. A pone e ‘ footage’  no editá na disposishon di CARMABI ku e fin pa usa esakinan pa estudio, investigashon i material edukativo.

The Suit ta ekstendé palabranan di gratitut na un grupo hopi grandi di instansia i individual ku a kontribuí na realisashon di e proyekto i e dokumental komo produkto final.

Pa hasi pedido pa karchi mester yama òf manda un SMS na e number (5999) 526 4671. No opstante ku LMF lo ke rekomendá tur hende pa wak e bunita produkshon aki, LMF tambe lo tene su mes estriktamente na e regla i medidanan ku Gobièrnu a instituí den kuadro di Covid-19 pa asina salbaguardiá salu’ di tur bishitante. Pa e motibu ei e kantidat di persona ku por permití den sala ta limitá.

Pa mas informashon por tuma kontakto ku bosero di Curaçao Underwater Kunuku, Sr. Frits Terborg na (5999) 525 0912.