WILLEMSTAD.- Ayera henter parti mainta te ku mèrdia un grupo selektá di miembronan di prensa tabatin e honor di eksperensiá parti di e  diferente ehersisionan ku e futuro milisianonan ta pasando aden durante nan estudio.

E hóbennan aki ya a pasa tres kuart di nan estudio i awor falta mas o ménos seis siman pa nan por terminá e estudio aki por kompleto. Ta trata di mas o ménos 26 hóben.

Ayera mainta tabata e promé dia di dos siman intenso. Durante di henter e dos simannan e hóbennan lo keda den mondi na Wacawa kaminda diariamente nan mester pasa den diferente ehersisio basta intenso. Ayera e miembronan di prensa a haña un rekorido den vehíkulonan militar na e diferente terenonan kaminda e ehersisionan ta tuma lugá. Entre otro tabatin ehersisio di tiru, kon pa atendé ku vehíkulonan i hopi mas.

Riba e kombinashon di fotonan por mira na momentu ku miembronan di prensa tabata eksperensiá e ehersisionan na un di e áreanan por sierto mas bunita di Kòrsou.