DEN HAAG/W’STAD.- Den kurso di ayera Sekretario di Estado sra. Alexandra van Huffelen a dirigí un karta na 2de Kamer relashoná ku desishonnan ku a kai den Konseho di Minister di Reino den kuadro di sosten di likides pa e di kuater kuartal di 2022. Den su karta van Huffelen ta bisa entre otro ku, a base di e konsehonan di e Kolegio pa Supervishon Finansiero (Cft), Konseho di Minister di Reino (RMR) a disidí pa no duna Kòrsou ni Aruba sosten di likides pa motibu ku di akuerdo ku Cft e paisnan aki no tin mester di sosten di likides. Segun Cft, na final di aña Kòrsou lo sera ku un saldo positivo di likides di 216 mion florin i Aruba ku 19 mion florin.  Ta bon pa informá tambe si ku ni Kòrsou ni Aruba a pidi sosten di likides.

E kalkulashon pa Aruba ainda lo por kambia a base di informashon adishonal ku ser generá. A base di e informashonnan ei lo por bini ku un adaptashon pa loke ta likides den fin di 2022. Pa loke ta St. Maarten, pa e di kuater kuartal di 2022 i konforme e konseho di Cft, esaki lo risibí 10 mion florin na sosten di likides.

T’asina ku dia 17 di febrüari 2022 segun e mandatario el a informá 2de Kamer ku RMR a bai di akuerdo pa permití pa desviá for di e normanan presupuestario pa motibu dje efektonan persistente dje pandemia di Corona. E desviashon permití tabata di akuerdo ku e añanan anterior, i pa aña presupuestario 2022 e tabata igual na e total na fiansanan ku e pais aki a hasi ku bendishon di RMR i pa hasimentu di gastunan durante 2022. Pa motibu di e situashon ei no por a duna un suma nominal. Esei pa motibu ku Cft a base di tur e inseguridat ku tabata eksistí rònt di desaroyo ekonómiko. Komo tal no por a indiká kiko lo ta e nesesidat na likides riba henter 2022.

Pero awor ku Cft por a duna un konseho riba e nesesidat pa likides pa e di kuater kuartal, tambe lo por hasi un kalkulashon pa henter 2022. A base di e konseho di Cft  a disidí ku Kòrsou i St. Maarten lo por tin un défisit máksimo riba e servisio ordinario di respektivamente 4 mion i 40 mion florin pa aña 2022.

Finalmente a disidí ku gobièrnu dje paisnan entrante 2023 mester tin presupuestonan atrobe ku ta kumpli ku tur normanan presupuestario ku ta ser menshoná Supervishon Finansiero di Reino. Teniendo kuenta ku e vishon di WHO, ku ta mira final dje pandemia di COVID, teniendo kuenta ku e rekuperashon ekonómiko den 2021 i 2022 i e speransa ku inflashon lo baha otro aña, RMR ta konkluí ku n’e momentunan aki e no ta kere ku lo honra kualke apelashon riba artíkulo 23 di LAft i artíkulo 25 di Rft basa riba e pandemia di covid.

Preokupashon:

For di prinsipio di 2021 e paisnan i e Organisashon di Trabou Temporal (TWO) a traha na dunamentu di kontenido na e Landspakket ku a keda akordá. Por sierto, den e di tres reportahe di implementashon ta duna kiko ta adelanto di e Landspakket. TWO ta bisa ku e adelanto den implementashon den e di kuater kuartal ta bon. Pero esei no ta kita afó ku e tin preokupashon.

Pa loke ta Kòrsou TWO tin un imágen miksto. E ta un tiki preokupá ku e klima komersial. E medidanan pa yega na maneho finansiero i e sektor públiko ta mustra retraso.