WILLEMSTAD.-Gerrit Schotte ta hòmber liber, despues di a sali for di prizòn awor aki. Despues di bebe un bon kòfi di kas e tin un kompromiso ku su kreadó i mas anochi e ke sinta kome un kuminda indio, un galiña den curry ku e i su yunan ta disfrutá ku nan por disfrutá huntu.

Schotte a bandoná prizòn i mesora topa ku un grupo grandi di prensa, famia i amistatnan ku tabata ward’e. Den e palabranan komo hòmber liber Schotte a keda pidi tur hende na e sitio pa kuida kurpa pasobra mundu ta den un pandemia. Ya kaba el a papia ku su yunan i e ta yama su kreadó danki i el a laga un blòk 6 ku detenidonan di Dios atras. E ta spera ku awor e lo por tin e ‘fair chance’ pa rehase su bida.

Mas aleu el a bisa ku den prizòn el a siña yuna, adorá i alabá. E situashon a kambi’e pa bon i awor su kondukta ta konforme boluntat di Dios. Tur detaye den edishon di EXTRA.

Preparashon pa risibí Gerrit Schotte na porta prizòn

WILLEMSTAD.-Awe ta 27 di novèmber, dia ku e fundadó i eks lider di partido MFK ta sali for di prizòn. Ya kaba tin hendenan ku a bai para hopi serka di prizòn pa asina nan por mira i saludá nan lider na momentu ku e sali for di prizòn dentro di algun minüt.

EXTRA a tuma nota ku tin hende a pone foto grandi di Schotte riba nan outo, demostrando e lealtat na e eks lider polítiko. Prizòn i tambe polis a tuma vários medida pa garantisá ku tur kos ta kana di forma ordená. EXTRA a tuma nota di simpatisantenan ku riba retnan sosial a invitá tur hende pa risibí Schotte pero a pidi pa tene kuenta ku reglanan den kuadro di Covid. Keda pendiente pasobra EXTRA ta trese e partinan mas importante.