WILLEMSTAD – Ministerio di Salubridat, Medio Ambiente i Naturalesa ta partisipá ku a señalá Pèchi Portugues na parti sùit di Kòrsou i playanan di Kenepa Grandi i Chikí. Na playa di Kenepa Chiki tabatin kaso di hende ku a bini den kontakto ku Pèchi Portugues i ku hasta mester a keda hospitalisá. Manera ya ta konosí, práktikamente tur aña den e temporada aki ku kambio temporal di bientu i òf koriente di laman, e organismo marino aki por drif yega nos kosta. Ta konsehá personanan ku ta bishitá playa e dianan aki pa paga bon tinu sigur na parti sùit di nos isla i playanan na Banda Bou.

E forma di e Pèchi Portugues ta di tal manera ku e ta move den laman den direkshon ku bientu ta supla. E ta relativamente fásil pa mira den laman komo por rekonosé na su forma di un blas òf saku di plèstik lila yená ku airu di mas o ménos 25 centimeter ku ta drif den laman. Si bo mir’é, keda leu, no buska manera di saké for di laman. Su tentakulonan bou di laman por alkansá mas ku 30 meter. Si bo bini den kontakto ku su tentakulonan, kita restante di tentákulo ku keda riba bo kueru sin grawat’é, laba e kueru ku awa di laman i apliká awa lou riba e área afektá. Tambe por apliká binager regular slap (1 pa 2 dòpi den 2 liter di awa) riba e área afektá. Si e área afektá keda kima òf hasi doló intenso, pone eis riba dje i bishitá bo dòkter di kas.