Miembronan di Tweede Kamer ke pone preshon riba minister di hustisia Quincy Girigorie, via di minister Raymond Knops, pa trese kambionan drástiko den e forma di detenshon di venezolanonan ku ta drenta Korsou di forma ilegal. Na e momentunan aki ta pone e hendenan aki den barak na prizon konsiderando ku Korsou no tin e fasilidatnan ni tampoko e fondonan pa kubri gastunan di posibel alokashon na e forma ku Ulanda ta pretendé.

Siman pasá parlamentarionan ulandes tabata na Korsou den kuadro di IPKO, ku ta e enkuentro entre Parlamentonan di e kuater paisnan den Reino. Na e okashon aki a bishita prizon SDKK na Koraal Specht tambe. E miembronan Paternotte, Bosman, De Graaf, Van Dam, Diertens, Van Raak, Kuiken i Özütok a firma un petishon ku ta bai awe mes pa minister Knops. E grupo di parlamentario ulandes ta pidi e minister ulandes pa na Korsou duna mas atenshon na protekshon di derecho, hustisia i seguridat di e personanan.

Manera indiká e miembronan a bai bishitá prizon i a haña splikashon kon e sistema ta funshoná den e instituto. Tambe a haña e oportunidat pa papia ku hendenan ku ta será den barak. Den e kaso ei tin parlamentario ulandes ku a saka telefon priva i fia hende den prizon pa yama famia, loke minister di hustisia di Korsou a keda di manda su reklamo.

E baraknan tin solamente lo básiko, manera sanitario básiko, no tin privasidat, masha poko fasilidat pa hasi deporte. E miembronan di Tweede Kamer ta konsiente ku nan a bishitá e baraknan na momentu ku no tin hopi persona, pero na momentunan ku tin hopi mas hende indokumentá e situashon lo ta hopi diferente. Den kaso ku un hende ta keda solamente 14 dia den barak e situashon ta aseptabel, pero den kaso ku hende mester bai keda algun luna den barak si nan ta di opinion ku esei no ta aseptabel mas.

E miembronan menshoná ta pidi minister Knops pa durante di e próksimo enkuentro di e kuater paisnan den kuadro di hustisia, pa pone e asuntu aki na diskushon pa trese kambio. Mas detaye den edishon di EXTRA.