WILLEMSTAD.-Resientemente minister di Salubridat Javier Silvania a huramentá un grupo relativamente grandi di hóbennan komo dòkter di kas i asistente botikario. Na e okashon ei e mandatario a hiba palabra felisitando e hóbennan i deseando nan tur klase di éksito den e trabou importante i balioso ku nan a skohe.

EXTRA a papia ku dr. Jerry Semper, médiko lokal ku basta aña pasá tambe a kaba su estudio i a bin traha na Kòrsou. Awendia Semper ta presidente di e asosiashon di Dòkternan di kas CHV.  Den su promé palabranan Semper a felisitá tur ku a huramentá. El a mustra ku mundialmente gastunan den salubridat ta subi ku un averahe di 3% pa aña. Motibu di esaki ta pasobra tin mas aparato moderno i kostoso, tambe debí na e tèstnan ku ta hasi pa determiná malesanan, otro aspekto ta e téknika i remedinan sofistiká ku ta hasi uso di dje awendia.

Pa e motibunan aki den añanan ku a pasa i esnan ku ta sigui e tendensia mundial, kaminda ku Dòkternan di kas lo mester hasi mas den kuido primario, lo sigui. Esaki ta nesesario pasobra a keda probá ku esaki ta yuda kontené gastunan den salubridat.

Tene kuenta ku gobièrnunan na mundu i na Kòrsou tambe lo mester fortalesé e kuido primario, esta kaminda Dòkternan di kas ta duna kuido, pa por hasi esaki. Kaminda lo konsentrá riba hisa kalidat di kuido primario. Un ehèmpel ta e HAP (huisartsenpost) ku ta na kaminda.

Finalmente e konseho di dr. Semper na tur dòkter di kas hóben: ‘No ta abo komo dòkter ta sentral, pero bo pashènt i salubridat di bo pais ta sentral. Duna tur pashènt e mesun trato ku lo bo a duna bo mes mama si e ta e pashènt.”