WILLEMSTAD.- E preisnan eksorbitante di materia prima riba merkado
internashonal ta suprayá vulnerabilidat di e balansa di pago di e union monetario,’ asina
presidente di Centrale Bank van Curaçao en Sint Maarten (CBCS), Richard Doornbosch, ta
atvertí den e Boletin Ekonómiko di Banko pa yüni 2022.
Debí ku Kòrsou i Sint Maarten tin ekonomia chikitu i habrí, nan ta dependé bastante di importashon. Un konsekuensia di esaki
ta ku, ignorando tur otro faktor, ora preis di importashon subi, e paisnan su défisit riba kuenta
koriente di balansa di pago tambe ta subi. Den e último dékada, e défisit riba kuenta koriente
di balansa di pago a representá aproksimadamente 17% di PIB, i esaki ta un porsentahe
relativamente haltu,’ Doornbosch ta sigui bisa. Apesar di e défisit struktural riba e kuenta
koriente di balansa di pago, tabatin un oumento konsiderabel di e reserva ofisial bruto,
prinsipalmente debí na finansiamentu eksterno, manera e fiansanan risibí di Hulanda. ‘Pues, por opservá dos defisiensia struktural di e balansa di pago: na promé lugá, un nivel haltu di
importashon ku no ta wòrdu kubrí pa loke e ekonomianan ta eksportá i, di dos, deterioro di e
posishon di invershon internashonal.
‘Aunke nos kobertura di importashon aktual ta kómodamente riba e norma di tres luna, e balansa
di pago ta den un situashon ku ta eksigí akshon,’ asina presidente di CBCS ta urgi. “Pues, e dos
gobièrnunan por implementá maneho pa hasi nos ménos dependiente di importashon i/òf pa
oumentá eksportashon. Nos kuenta di importashon di petroli ta representá aproksimadamente
20% di nos importashon total.
Debí ku, por lo general, demanda di kombustibel ta relativamente inelástiko riba término korto, e oumento aktual drástiko di preis di krudo riba merkado internashonal lo pone nos kosto total di importashon di krudo subi
konsiderablemente.
Ta rekomendabel pa e gobièrnunan tuma e medidanan nesesario, manera insentivo fiskal i reforma di e regulashonnan korespondiente, pa aselerá nos transishon di kombustibel fósil pa energia
renobabel. Kòrsou i Sint Maarten ta bendishoná ku rekurso natural, manera solo, laman i bientu,
ku por ser usá pa generá energia alternativo. Ademas, si invertí den fuente di energia renobabel, esei lo krea un sektor ekonómiko nobo ku por generá mas ganashi via eksportashon i stimulá
kresementu ekonómiko,’ Doornbosch ta rekomendá. Maske te asina leu nos a logra finansiá e
défisitnan kuantioso riba e kuenta koriente, no por djis asumí ku semper esei lo ta e kaso. Pues, si
implementá maneho pa fortifiká e kuenta koriente di balansa di pago, esei lo mehorá nos posishon
di invershon internashonal tambe’, Doornbosch a agregá.

LAGA UN KOMENTARIO

Please enter your comment!
Please enter your name here