WILLEMSTAD.- Presidente di Kolegio Supervishon Finansiero di Kòrsou i Sint Maarten (Cft) Lidewijde Ongering den un karta pa minister di Finansa Javier Silvania ta bisa ku ‘Cft ta sigui preokupá pa e presupuesto di Kòrsou pa 2024.’

Ongering a manda un karta dia 7 di desèmber 2023 ku un konseho tokante di e Nota di Modifikashon di e proyekto presupuestario 2024 di Kòrsou. Awor Cft a publiká e karta riba nan wèpsait, ku esaki e ta habri pa prensa i públiko.

Manera ta konosí riba 1 di sèptèmber 2023, Kolegio di supervishon finansiero di Kòrsou i Sint Maarten a duna konseho tokante di e proyekto presupuestario (OB) 2024 di Kòrsou.  Cft a konstatá ku e OB, debí na falta di e prosesamentu ku sifra di e refinansiamentu di e sosten di likides i e solushon pa e problemanan serka e aseguradó di penshun ENNIA, no tabata kompletu.

Riba 23 di novèmber 2023, Cft a risibí e Nota di Modifikashon aki. Den su karta di 7 di desèmber Cft ta duna su konseho. Ongering ta skirbi: ‘Ku e Nota di Modifikashon, Kòrsou ta oumentá strukturalmente e gastunan di personal, komo konsekuensia di e indeksashon di e salarionan di ámtenarnan i personal asimilá na 2019 i 2020. Den e OB 2024, ya kaba Kòrsou a inkluí gastunan pa e otorgamentu di e indeksashon i un loontrede. Ku e Nota ta oumentá e montantenan aki ainda mas.’

Den su karta presidente Onngering di Cft ta hala atenshon riba e echo ku e gastunan di personal presupuestá ta ‘supstansialmente mas haltu ku e realisashon antisipá pa 2023.’ Cft ta ekspresá su preokupashon tokante di e oumento di e gastunan di personal.

Maske ku e Nota den e periodo 2024-2027 Kòrsou ta presupuestá surplusnan riba e presupuesto operashonal, Cft ta sigui preokupá pa e presupuesto.

E surplusnan prinsipalmente ta prosedé di e ingresonan di e ‘fee’ di lisensianan pa oferentenan di weganan di azar. E legislashon ku mester pa esei te ainda no a ser adoptá. Cft ta urgi pa implementá esaki mas pronto posibel, pa asina pèrkurá ku efektivamente lo realisá e ingresonan aki na 2024 i multianualmente.’

Tambe Cft ta skirbi: ‘Ademas, e presupuesto ku e Nota di Modifikashon ainda ta kontené e ingresonan pa interesnan i amortisashonnan ku mester keda pagá pa Curaçao Medical Center (CMC). Debí na e situashon finansiero prekario di e hospital, tin hopi riesgo ku e pagonan aki lo no tuma lugá. P'esei, den e modifikashon di proyekto
presupuestario 2023 ya kaba a eliminá e pagonan aki. Banda di esei, Cft ta bolbe enfatisá e nesesidat di yega na un solushon na plaso sumamente korto pa e problemátika finansiero di e CMC pa evitá un break down. Den e marko aki, Cft ta bolbe pidi Kòrsou pa inkluí un previshon pa e fiansa di pais na CMC den e presupuesto ya kaba.’