Kòrsou mester kuminsá pone atenshon loke ta pasando den mundu

ARGENTINA, BUENOS AIRES/WILLEMSTAD.- Na Argentina por tuma nota kon e presidente nobo Javier Milei a drenta i a topa ku menasa di un paro general, esta un wèlga nashonal den e pais. Esaki ta despues ku e presidente Milei, ultra derechista i konosí komo e Trump di Latinoamérika, a anunsiá kambionan drástiko den e pais. E sindikatonan mas grandi a uni forsa i ta hasi yamada na hinter e poblashon pa partisipá den un pargo general. Un di e medidanan ku Milei ku introdusí ta redukshon di derechonan laboral di empleadonan.

EXTRA a aserka sindikalista lokal Nacho Ignacio riba e desaroyonan ku ta tumando lugá na diferente parti di mundu. Esaki ta momentu pa Kòrsou kuminsá pone atenshon na desaroyonan mundial? Mester siña for di loke ta pasando? Na opinion di Nacho Ignacio, tin algun punto ku Kòrsou mester paga bon tinu pa atendé kuné lihé i eseinan ta salubridat publiko i CMC, enseñansa i e riesgonan rondó di pilanan ekonómiko pa e pais aki.

...Roland “Nacho” Ignacio...

Otro di e medidanan ku presidente Milei ke introdusí na Argentina ta ku ke hasi e periodo di prueba (proeftijd) di un trahadó 8 luna na lugá di 3 luna ku ta e kaso aktualmente. Tambe Milei ke kòrta e durashon di liber pa embaraso(zwangerschapsverlof). Roland Nacho Ignacio, eks presidente sindikal awendia ta aktivo riba tereno internashonal brindando su konosementu komo sekretario general na Alternativa Democratica Sindical de las Americas (ADS). ADS di forma habrí a duna sosten total na e paro general ku e sentralnan sindikal i organisashonnan sindikal i sosial a yama. Manera indiká esaki ta akshon fuerte kontra e leinan di reforma anti popular i anti sindikal konosí komo ‘Plan Motosierra” ku presidente Milei a presentá. ADS a hasi yamada na hinter e poblashon pa partisipá na e manifestashonnan den kuadro di e paro general.

Argentina ta e di dos pais mas grandi di sur Amérika, despues di Brasil.  E ta e di kuater pais mas grandi den Americas i e di 8 pais mas grandi di mundu. Ignacio ta mustra kon na Argentina poko poko trahadónan a kuminsá realisá ku nan mester mobilisá pa para e plannan di e presidente. Brasil a konosé e periodo di presidente Bolsonaro ku a destabilisá e balansa sosial ekonómiko den Conosur. Brasil i Argentina ta e dos paisnan mas grandi di Conosur, ku otro palabra nan polítika i relashonnan interno tin influensia den hinter Latinoamérika. Milei ta riba mesun ruta ku Bolsonaro i asta den sierto kasonan Milei ta asta mas agresivo. Den tur e paisnan por nota e kambio di gobièrnunan iskierdista pa ultra derechista. E balansa ta mei mei kaminda e poblashonnan ta haña stabilidat.

Pa Kòrsou importante ta atenshon pa CMC, enseñansa i e rísikonan pa pilanan ekonómiko. Mas detaye den edishon di EXTRA.