CARACAS.-Informashon ku EXTRA a kaba di risibí ta indiká ku un ratu pasa presidente di Venezuela Nicolas Maduro a deklará ku e ta dispuesto na papia pa solushon tur problema òf diferensia di opinion entre Aruba, Kòrsou, Boneiru i Venezuela. Presidente Maduro ta bisa ku e sa ku e pueblonan di e islanan ulandes ta stima Venezuela i meskos ta konta pa e pueblo venezolano ku stima e islanan ulandes.

Tur esaki a bini despues ku Ulanda a nombra un hefe di mishon nobo na Caracas ayera.

Ta asina ku djamars 27 di oktober e minister di Relashonnan Eksterior di Venezuela Jorge Arreaza a risibí e kredensialnan di Robert Schuddeboom, kende ta e hefe nobo di mishon di embahada di Ulanda na Venezuela. Esaki a tuma lugá durante di un seremonia protokolar na Casa Amarilla na Caracas, asina un informe di gobièrnu Bolivariano de Venezuela ta anunsiá.

E informe ta sigui bisa ku durante di e enkuentro e kansier venezolano a duna bon bini na e diplomátiko oropeo i a konfirmá ku gobièrnu Bolivariano ta den posishon pa alsa e nivel di e relashonnan ku Reino ulandes, konsiderando  relashon históriko i e hermandat entre e pueblonan di Venezuela, Aruba, Korsou i Boneiru.

‘Kualke diferensia di opinion ku lo por  a surgi, nos mester konfrontá esaki pa medio di diálogo, komunikashon dirèkt pa resolvé esakinan”, asina e minister venezolano a duna di konosé. Tambe el a menshoná ku mester solushoná e problemanan di migrashon i restituí turismo entre e paisnan, ademas kordiná esfuersonan di e nivel di mas haltu ku Reino ulandes pa atendé e tema di seguridat ku ta enserá krímen organisá i narkotráfiko den Karibe.

Di su parti Schuddeboom a bisa ku pa Ulanda i Reino ta sumamente importante ku tin un bon relashon ku Venezuela. Anteriormente Schuddeboom tabata embahador na Repúblika di Congo.