WILLEMSTAD.- Un dje hòmbernan venezolano ku a tira riba dos agente polisial den anochi di 22 òktober 2015 a trata di hui ayera mardugá for di prizòn.
Segun EXTRA a komprondé ku e hòmbernan aki a logra di sali for di nan sèl, despues di a kòrta esaki, pero ora nan a tuma nota di a keda gará, a regresá e sèl. Pero investigashon i bon trabou di parti mando i wardadónan di prezu a logra detektá e ‘buraku’ dje huida.
Direktor di prizòn sr. Urny Floran a konfirmá pa EXTRA e intento di huida.
El a indiká ku den oranan di mardugá, nan kámaranan sofistiká a detektá dos prezu ta kana riba dak. A yama polis pa kontrolá parti pafó, pero e agentenan no a haña nada.
Sinembargo e personal di prizòn na warda, a keda vigilá e situashon, i keda atento riba tur e sistemanan elektróniko di seguridat sofistiká ku prizòn tin. Un investigashon profundo a saka afó ku ta e dos prezunan ku ta kedando den sèl di Blok 4 a zag e sèl i sali afó.
Ta trata di e hòmber venezolano di inisial A.C.V. ku ta sintando kastigu pa intento di asesinato riba e dos agentenan polisial na òktober di 2015 i e prezu kurasoleño D.E.
Ayera tardi lat pa anochi a tene un redada den e sèl dje dos prezunan aki, i a bin haña algun kos ku nan a traha pa zag e sèl. Entre otro un kabuya trahá ku plèstik i tambe un pida blet chikí pa zag heru.
Mesora a saka e prezunan for di den e sèl i a alohá nan den otro sèl blòk di prizòn.
Sr. Floran a indiká ku ta danki na e sistema elektróniko sofistiká i tambe e personal na warda ku a keda vigilá henter e asuntu aki, a frustra intenshon dje dos prezunan.