Gerensia SDKK a bai akuerdo pa famia trese matras  pero esaki no a sosodé

WILLEMSTAD.-  Propietario di Hot chicks, ántes Hot wings cafe riba Gosieweg  Nelson Trinidat, a dirigí un karta na EXTRA su adrès di mail, kaminda e ta splika su desapunto pa ku e sistema kon e personal di prizòn ta trat’é.

Anteriormente Trinidat tabata den sala di korte pa su kaso ku a haña e nòmber “ Tres Belle” keda tratá den pro forma. Durante e kaso el a trese vários punto ku tin di aber ku su salú, di kual el a pidi maneho di prizòn pa tene kuenta kuné.

Trinidat aktualmente ta enkarselá den prisòn  pendiente pa su kaso keda tratá, despues ku Ministerio Públiko ta akus’é pa trafikashon di hende.

Durante su kaso el a splika ku e tin un hernia na su lomba ku tin ku wòrdu operá.

Mas aleu el a duna di konos’é ku prizòn no ta disponé di un dietista, ni un dòkter. Tambe el a bisa ku e mester drumi riba un matras ortopédiko mirando ku e tin un man mankaron ku no ta bai abou  i ku  ora e drumi e tin ku pone e man sosegá sino e ta keda den laira.

E akusado a asta drumi plat abou den sala di korte pa mustra hues ku su man no ta bai abou.

El a bisa di a pidi un kusinchi i e matras spesial, pero prizòn a bis’é ku no tin sèn pa kumpra e matras. A ofresé pa su famianan kumprá trese pe, pero nan no a tende nada mas di esaki. E akusado a bisa ku e ta haña ku e mester ta sera, pero ku mester para responsabel pa  su situashon di salú.

Ayera Trinidat a splika den su karta pa EXTRA ku  el a papia ku zùster Fullinck,  dr Maduro  i mener Maria di direktiva bewaker, di kual  niun hende no ta hasi nada.

P’esei e úniko  opshon ku a ked’é na su pareser ta  di dirigí su mes na  prensa pa asina haña su derechinan.

El a relatá  ku e tin 6 luna ta drumi riba un kama ku no ta pas mi i p’esei el a hañ’é ta  drumi abou,  di kual na su opinion ta kontra derecho humano.

El a duna di konos’é ku nan ta papia di ilegalnan kaminda tin yu di tera mes ta drumi riba suela siendo e tin un hèndikèp i problema ku lomba. El a bisa  tambe  ku nada ku el a pidi nan no a drecha.

Segun Trinidat, e  situashon for di su promé dia na Barber, e no ta pas riba e kama. El a splika ku hues a duna òrdu na Ministerio Públiko i SDKK pa drecha su situashon i te ainda nada.  El a bisa ku e tin  problema ku kurason tambe i no tin ni interkom den su sèl  si e bira malu pa yama bewaker. El a bisa ku nan tin tur motibu pa posponé su detenshon,  pero na su opinion aparentemente tin klase di hustisia.

Den e desishon di Hof  pa posponé su detenshon, e tribunal a duna di konosé ku despues di un siman di e desishon gerensia di prizòn mester a sòru pa un matras pa ku Trinidat, di kual na su pareser esaki ainda no a tuma lugá.

EXTRA a drenta den kontakto ku gerensia di prizòn, di kual nos a keda informá ku nan a bai di akuerdo pa famianan por trese un matras pero te ainda nan no a mira esaki sosodé.

Foto

...Riba e foto por mira Trinidat drumí  pa ilustrá e loke e ta splika...