Fiskal Girigoria-Hernandez

WILLEMSTAD.- Fiskal Girigoria–Hernandez ayera a bisa ku e no ta haña nesesario pa manda e stazjèr S.I. (24) akusá di a trata na hinka 27 gram di mariwana bèk prizòn.
S.I. a keda detené dia 30 di òktober 2019 na prizòn SDKK, na momento ku a gar’e ku 2 blòki di hash den su parti íntimo.
E dia ei outoridatnan konserní a haña un yamada ku e akusado lo tin droga den su poder.
Na momento ku el a keda gará, el a atmití su kulpa mes ora.
El a bisa ku e droga lo tabata destiná pa e detenido K. Aitatus ku a pidié pa hasié e fabor.
S.I. tabata studiando pa trahadó sosial na universidat di Kòrsou. Fiskal a haña e akusashon probá abase di su mes deklarashonnan i tambe e droga ku a hañ’e kuné.
E akusado a keda enkarselá 8 dia. Mirando tur esakinan fiskal a demand’é na 90 dia di kual 81 kondishonal mas 50 ora di trabou pa komunidat.
Fiskal a bisa ku e ke dun’e un chèns mas, mirando ku el a siña su lès i a mustra duele di loke el a hasi.
Su abogado mr. Becher durante su defensa, a bisa ku e akusado ta mama di un yu muhé di 3 aña.
Dos luna promé ku e suseso, e tata di su yu a kibra kuné i a lag’e na kaya.
E akusado tabatin hopi falta di atenshon i fásilmente a kai den gara di e detenido ku tabata dun’e atenshon tur dia i asina a maluzá di su konfiansa.
Esaki a pone ku el a bai di akuerdo ku e detenido pa hinka droga pe den prizòn.
Mas aleu e abogado a bisa ku un siman promé e akusado a bisa ku e no kier a kore stazje mas den SDKK.
Pero e preshon ku el a haña di parti di e detenido a pone ku el a kometé e akto. E no tin trabou i ta dependiendo kompletamente di su tata.
Segun e abogado dia e akusado tabatin 14 aña, el a trata na kometé suisidio. P’esei e abogado a pidi korte pa tene kuenta ku e akusado su situashon i no dun’e un kastigu di prizòn.
Fiskal na su turno a splika ku ta trata aki di un dama inteligente di un nivel di estudio di HBO ku lo mester tabata sa mihó kiko e ta hasiendo ku tur e konsekuensianan.
Hues Verbeek den su desishon a bisa ku no ta importante kua tipo di droga e akusado tabatin, pero fo’i ora ta trata di kosnan ilegal, e mester a pensa promé.
Na final hues a bisa ku e ta bai di akuerdo ku e demanda di fiskal i tambe e ta duna e akusado un chèns, pero ku e tin ku sigui algun training i tambe guia di Reclassering.