WILLEMSTAD.- Primanan di seguro di outo WA por subi te asta ku 13%. Esaki ta bira posibel pa motibu ku kompanianan di seguro lo por hasi un apelashon riba lei i apliká e oumento. Esei EXTRA por a komprondé. T’asina ku for di siman pasá e Asosiashon di Seguronan di Kòrsou i Boneiru (CBIA) a emití un karta den kual nan ta informá dje paso aki ku nan lo tin di bai tuma teniendo kuenta ku nan gastunan ku ta oumentando.

Den su karta CBIA ta bisa ku, primanan pa loke ta “Wettelijke Aansprakelijkheid” (WA) pa vehíkulonan di motor no a keda adaptá for di 1999, i konsekuentemente esaki ya no ta kumpli ku e aktual desaroyonan finansiero i sosial ekonómiko. Banda di esei e gastunan relashoná ku daño den e sektor di WA pa vehíkulonan motorisá a subi drástikamente den e periodo di 1999-2017. E inflashon akumulá den e periodo aki ta di mas ku 40%.

Teniendo kuenta ku un ke otro ariba menshoná e Asosiashon a entregá un petishon na Minister di Desaroyo Ekonómiko pa por bai over na adaptashon di e primanan. Por bisa ku parsialmente e petishon aki a keda honrá.

Esei ta enserá ku a base di PB 2017 no. 80 kompanianan di seguro por hasi adaptashon di primanan di seguro WA pa vehíkulonan motorisá entrante e fecha di 29 di sèptèmber 2017.

Bachi Legal

T’asina ku henter e asuntu aki ta ser sostené pa lei, pues e ta hinká den un bachi legal. E proposishon di kambio dje lei ku a bai pa konseho serka Konseho Konsultativo (Raad van Advies) ta bisa entre otro ku e intenshon ta pa hala aden e lei anterior ku tabata konta for di 10 di òktober 2010, pues na momentu ku Kòrsou a bira un pais outónomo den Reino.

Pero segun e lei, dado momentu a surgi un nesesidat pa via di un areglo ministerial ku tin un karakter general krea e posibilidat pa por stipulá un prima básiko máksimo pa loke ta seguro di outo.

Pero den e mesun rosea Konseho Konsultativo ta bisa ku e ta di opinion ku e intenshon di gobièrnu, te asina leu ta trata protekshon di e konsumidó mester ser inkluí òf ser adaptá den un nota di splikashon.